عالمی ریئل اسٹیٹ خبریں

نیویارک | ری نیوز انٹرنیشنل ڈیسک نیوز
امریکہ کی مجموعی ہاؤسنگ مارکیٹ اس وقت سست روی کا شکار ہے، تاہم مصنوعی ذہانت (اے آئی) سے پیدا ہونے والی نئی دولت نے لگژری رئیل اسٹیٹ مارکیٹ کو ایک مختلف رفتار دے دی ہے۔ خاص طور پر سان فرانسسکو ساحلی علاقے میں اے آئی کمپنیوں سے وابستہ دولت مند خریدار مہنگے گھروں میں بڑی سرمایہ کاری کررہے ہیں۔
میڈیا رپورٹس کے مطابق تازہ ریڈفن اعداد و شمار سے ظاہر ہوتا ہے کہ امریکہ میں لگژری گھروں کی فروخت میں سالانہ بنیاد پر تقریباً 2 فیصد اضافہ ہوا ہے، جبکہ ان گھروں کی درمیانی قیمت میں 4.3 فیصد اضافہ ریکارڈ کیا گیا ہے۔
رپورٹس کے مطابق سان فرانسسکو میں لگژری ہوم سیلز میں تقریباً 39.3 فیصد اضافہ ہوا ہے، جو ملک کے مجموعی لگژری پراپرٹی رجحان کے مقابلے میں نمایاں تیزی کو ظاہر کرتا ہے۔
ریئل اسٹیٹ مارکیٹ کے ماہرین کے مطابق اس رجحان کے پیچھے ٹیکنالوجی اور خاص طور پر AI سیکٹر سے وابستہ افراد کی بڑھتی ہوئی دولت ایک اہم عنصر ہے۔ AI کمپنیوں کے بانیوں، اعلیٰ عہدیداروں اور ملازمین میں دولت میں اضافے نے انہیں کروڑوں ڈالر مالیت کے گھروں کی خریداری کی زیادہ صلاحیت فراہم کی ہے۔
یہ صورتحال امریکی ہاؤسنگ مارکیٹ میں ایک دلچسپ فرق پیدا کررہی ہے۔ ایک طرف عام خریدار بلند قیمتوں اور رہن کی لاگت کے باعث محتاط ہیں، جبکہ دوسری جانب انتہائی دولت مند خریدار مہنگی اور پرتعیش پراپرٹیز میں سرمایہ کاری جاری رکھے ہوئے ہیں۔
ماہرین کے مطابق اگر اے آئی سے وابستہ دولت میں اضافہ جاری رہا تو امریکہ کے بڑے ٹیک مراکز میں لگژری رئیل اسٹیٹ کی طلب مزید مضبوط ہوسکتی ہے، جس سے عام اور لگژری ہاؤسنگ مارکیٹ کے درمیان فرق بھی بڑھنے کا امکان ہے۔

پراپرٹی کنسلٹنسی سی بی آر ای کے مطابق، ہانگ کانگ کی لگژری رہائشی مارکیٹ میں قیمتوں میں اصافہ ہوا اور انتہائی مہنگی جائیدادوں کے سودوں میں نمایاں اضافہ ہوا، جبکہ مین لینڈ چینی خریداروں کی طلب مارکیٹ کو سہارا دیتی رہی۔

2026 کے ابتدائی نو ماہ میں لگژری گھروں کی قیمتوں میں سال کے آغاز سے اب تک 5.3 فیصد اضافہ ہوا۔ قیمتیں مارچ 2025 میں ریکارڈ کی گئی کم ترین سطح سے 11.3 فیصد بلند رہیں۔ سی بی آر ای کے مطابق مارکیٹ میں زیادہ اتار چڑھاؤ اور شرحِ سود سے متعلق غیر یقینی صورتِ حال کے باوجود یہ شعبہ مستحکم رہا۔

انتہائی مہنگی جائیدادوں کے شعبے میں سرگرمی میں تیزی دیکھی گئی۔ جنوری سے ستمبر کے دوران 10 کروڑ ہانگ کانگ ڈالر سے زائد مالیت کی جائیدادوں کے 197 سودے ہوئے، جو گزشتہ سال کے اسی عرصے کے مقابلے میں 109.6 فیصد زیادہ ہیں۔ ان سودوں کی مجموعی مالیت 54.9 فیصد اضافے کے ساتھ 2820 کروڑ ہانگ کانگ ڈالر تک پہنچ گئی۔

تیسری سہ ماہی میں مین لینڈ چینی خریداروں نے پرائمری مارکیٹ میں لگژری رہائشی جائیدادوں کے 72 فیصد اور سیکنڈری مارکیٹ کے 68 فیصد سودوں میں حصہ لیا۔ سی بی آر ای کے مطابق، مین لینڈ چین سے مسلسل طلب اور اعلیٰ معیار کی رہائشی جائیدادوں کی محدود دستیابی مارکیٹ کو سہارا دے رہی ہے۔

سی بی آر ای ہانگ کانگ کے ایگزیکٹو ڈائریکٹر برائے ویلیوایشن اینڈ ایڈوائزری سروسز ایڈی کووک نے کہا کہ شرحِ سود سے متعلق غیر یقینی صورتِ حال اور سرمائے پر سخت کنٹرولز کے باوجود لگژری رہائشی مارکیٹ نے اپنی مضبوطی برقرار رکھی۔ ان کے مطابق بالخصوص مین لینڈ چین سے تعلق رکھنے والے صاحبِ ثروت خریدار انتہائی مہنگی جائیدادوں کے شعبے میں سرگرمی جاری رکھے ہوئے ہیں، جبکہ نئی جائیدادوں کی محدود فراہمی اہم مقامات پر قیمتوں کو سہارا دے رہی ہے۔

عالمی جغرافیائی سیاسی اور معاشی غیر یقینی صورتِ حال کے باوجود سعودی عرب کی رئیل سٹیٹ مارکیٹ سرمایہ کاروں کی توجہ حاصل کر رہی ہے۔ مضبوط مقامی طلب اور رہائشی مکانات کی فراہمی بڑھانے کی کوششیں اس شعبے کو سہارا دے رہی ہیں۔ وزارتِ بلدیات و ہاؤسنگ کے مطابق جنوری سے اکتوبر 2026 کے اختتام تک مملکت بھر میں ساکانی پلیٹ فارم کے ذریعے 15 ہزار سے زائد رہائشی پلاٹ فراہم کیے گئے، جبکہ نجی شعبے نے بھی نئے منصوبے شروع کیے ہیں۔
ڈویلپر ادارہ ارادہ نے مقامی کمپنی ایکسٹوپیا کے ساتھ شراکت داری کے ذریعے سعودی مارکیٹ میں قدم رکھا ہے۔ اس شراکت داری کو زمین اور ترقیاتی مواقع کے 50 ارب ریال (13.3 ارب ڈالر) مالیت کے پورٹ فولیو کی حمایت حاصل ہے۔ دونوں کمپنیوں کا پہلا منصوبہ ریاض کے علاقے الرمال میں 14 ارب ریال کی رہائشی ترقی ہے۔

دوسری جانب ریاض ریجن میونسپلٹی، وزارتِ بلدیات و ہاؤسنگ اور نیشنل سینٹر فار پرائیویٹائزیشن اینڈ پبلک پرائیویٹ پارٹنرشپ نے شمالی ریاض میں میونسپل اراضی کی مشترکہ سرمایہ کاری کے منصوبے کے لیے اظہارِ دلچسپی، پری کوالیفکیشن اور تجاویز جمع کرانے کے مراحل شروع کر دیے ہیں۔ نجی شعبے کے ساتھ 50 سالہ شراکت داری میونسپلٹی کا اس طرز کا پہلا منصوبہ ہے۔

اضافی زمین کی فراہمی سے درمیانی مدت میں قیمتوں کا دباؤ کم ہو سکتا ہے، بشرطیکہ پلاٹوں کا محلِ وقوع اور رقبہ حقیقی طلب کے مطابق ہو۔ اس سے ڈویلپرز، ٹھیکیداروں، انجینئرنگ کمپنیوں اور تعمیراتی سامان فراہم کرنے والوں کے لیے بھی کام کے مواقع پیدا ہو سکتے ہیں۔

رئیل اسٹیٹ ڈویلپر احمد عمر باسودان نے میڈیا سے گفتگو کرتے ہوئے کہا کہ صرف مکانات اور پلاٹوں کی تعداد بڑھانا مارکیٹ کے مسائل حل کرنے کے لیے کافی نہیں۔ ان کے مطابق رہائش خریداروں کی استطاعت کے مطابق ہونی چاہیے، اس کے ساتھ مناسب محلِ وقوع، بنیادی سہولیات اور انفراسٹرکچر کی دستیابی اور تعمیراتی لاگت پر قابو بھی ضروری ہے۔ انہوں نے کہا کہ نئی زمین اور نجی منصوبے بڑھتی آبادی اور شہری پھیلاؤ کے تناظر میں رسد اور طلب میں توازن قائم کرنے کی کوششوں کا حصہ ہیں۔