عالمی ریئل اسٹیٹ خبریں

واشنگٹن | ری نیوز انٹرنیشنل ڈیسک
امریکی صدر ڈونلڈ ٹرمپ نے دعویٰ کیا ہے کہ یورپی یونین نے روس کو توانائی کی مد میں 250 ارب ڈالر ادا کیے، جبکہ امریکی ذرائع ابلاغ اس اہم معاملے کو اجاگر کرنے سے گریز کر رہے ہیں۔ انہوں نے اپنے فیصلوں کا دفاع کرتے ہوئے کہا کہ امریکی عوام کے مفاد کو ہمیشہ ترجیح دینا درست فیصلہ تھا۔
ٹرمپ نے سوشل میڈیا پر جاری بیان میں یورپی یونین کی جانب سے روس کو توانائی کی ادائیگیوں کا حوالہ دیتے ہوئے امریکی میڈیا کو تنقید کا نشانہ بنایا۔ ان کا کہنا تھا کہ ذرائع ابلاغ اس معاملے کو اہمیت نہیں دے رہے، جبکہ انہوں نے ’’امریکا فرسٹ‘‘ کی پالیسی کو اپنے فیصلے کا جواز قرار دیا۔ امریکی نشریاتی ادارے اے بی سی نیوز کے مطابق، ٹرمپ نے ادائیگیوں کے لیے کسی مخصوص مدت کی وضاحت نہیں کی۔ تاہم، روسی فوسل فیول کی درآمدات سے متعلق ایک تحقیقی ٹریکر کے اعداد و شمار میں یوکرین جنگ کے آغاز سے یورپی یونین کی ادائیگیوں کا تخمینہ اس رقم کے قریب بتایا گیا ہے۔
دوسری جانب ٹرمپ نے ایران کی بحری قوت کے حوالے سے بھی دعویٰ کیا ہے کہ اس کے تمام 159 بحری جہاز سمندر برد کر دیے گئے۔ ان کے اس بیان کے مطابق ایرانی بحری بیڑے کو شدید نقصان پہنچایا گیا ہے۔ تاہم، اس دعوے کی مکمل آزادانہ تصدیق کے لیے مزید شواہد درکار ہیں۔
امریکی صدر نے سابق امریکی صدور اور اپنے دورِ صدارت کا تقابلی خاکہ بھی شیئر کیا، جس کے ذریعے انہوں نے اپنی پالیسیوں اور فیصلوں کو نمایاں کرنے کی کوشش کی۔
ٹرمپ کے حالیہ بیانات میں روس کے ساتھ توانائی کی تجارت، یورپی یونین کی ادائیگیوں اور ایران کی بحری صلاحیتوں کے معاملات نمایاں رہے ہیں۔ ان دعوؤں کے تناظر میں توانائی کی عالمی سیاست اور امریکی خارجہ پالیسی ایک بار پھر توجہ کا مرکز بن گئی ہے

پراپرٹی کنسلٹنسی سی بی آر ای کے مطابق، ہانگ کانگ کی لگژری رہائشی مارکیٹ میں قیمتوں میں اصافہ ہوا اور انتہائی مہنگی جائیدادوں کے سودوں میں نمایاں اضافہ ہوا، جبکہ مین لینڈ چینی خریداروں کی طلب مارکیٹ کو سہارا دیتی رہی۔

2026 کے ابتدائی نو ماہ میں لگژری گھروں کی قیمتوں میں سال کے آغاز سے اب تک 5.3 فیصد اضافہ ہوا۔ قیمتیں مارچ 2025 میں ریکارڈ کی گئی کم ترین سطح سے 11.3 فیصد بلند رہیں۔ سی بی آر ای کے مطابق مارکیٹ میں زیادہ اتار چڑھاؤ اور شرحِ سود سے متعلق غیر یقینی صورتِ حال کے باوجود یہ شعبہ مستحکم رہا۔

انتہائی مہنگی جائیدادوں کے شعبے میں سرگرمی میں تیزی دیکھی گئی۔ جنوری سے ستمبر کے دوران 10 کروڑ ہانگ کانگ ڈالر سے زائد مالیت کی جائیدادوں کے 197 سودے ہوئے، جو گزشتہ سال کے اسی عرصے کے مقابلے میں 109.6 فیصد زیادہ ہیں۔ ان سودوں کی مجموعی مالیت 54.9 فیصد اضافے کے ساتھ 2820 کروڑ ہانگ کانگ ڈالر تک پہنچ گئی۔

تیسری سہ ماہی میں مین لینڈ چینی خریداروں نے پرائمری مارکیٹ میں لگژری رہائشی جائیدادوں کے 72 فیصد اور سیکنڈری مارکیٹ کے 68 فیصد سودوں میں حصہ لیا۔ سی بی آر ای کے مطابق، مین لینڈ چین سے مسلسل طلب اور اعلیٰ معیار کی رہائشی جائیدادوں کی محدود دستیابی مارکیٹ کو سہارا دے رہی ہے۔

سی بی آر ای ہانگ کانگ کے ایگزیکٹو ڈائریکٹر برائے ویلیوایشن اینڈ ایڈوائزری سروسز ایڈی کووک نے کہا کہ شرحِ سود سے متعلق غیر یقینی صورتِ حال اور سرمائے پر سخت کنٹرولز کے باوجود لگژری رہائشی مارکیٹ نے اپنی مضبوطی برقرار رکھی۔ ان کے مطابق بالخصوص مین لینڈ چین سے تعلق رکھنے والے صاحبِ ثروت خریدار انتہائی مہنگی جائیدادوں کے شعبے میں سرگرمی جاری رکھے ہوئے ہیں، جبکہ نئی جائیدادوں کی محدود فراہمی اہم مقامات پر قیمتوں کو سہارا دے رہی ہے۔

عالمی جغرافیائی سیاسی اور معاشی غیر یقینی صورتِ حال کے باوجود سعودی عرب کی رئیل سٹیٹ مارکیٹ سرمایہ کاروں کی توجہ حاصل کر رہی ہے۔ مضبوط مقامی طلب اور رہائشی مکانات کی فراہمی بڑھانے کی کوششیں اس شعبے کو سہارا دے رہی ہیں۔ وزارتِ بلدیات و ہاؤسنگ کے مطابق جنوری سے اکتوبر 2026 کے اختتام تک مملکت بھر میں ساکانی پلیٹ فارم کے ذریعے 15 ہزار سے زائد رہائشی پلاٹ فراہم کیے گئے، جبکہ نجی شعبے نے بھی نئے منصوبے شروع کیے ہیں۔
ڈویلپر ادارہ ارادہ نے مقامی کمپنی ایکسٹوپیا کے ساتھ شراکت داری کے ذریعے سعودی مارکیٹ میں قدم رکھا ہے۔ اس شراکت داری کو زمین اور ترقیاتی مواقع کے 50 ارب ریال (13.3 ارب ڈالر) مالیت کے پورٹ فولیو کی حمایت حاصل ہے۔ دونوں کمپنیوں کا پہلا منصوبہ ریاض کے علاقے الرمال میں 14 ارب ریال کی رہائشی ترقی ہے۔

دوسری جانب ریاض ریجن میونسپلٹی، وزارتِ بلدیات و ہاؤسنگ اور نیشنل سینٹر فار پرائیویٹائزیشن اینڈ پبلک پرائیویٹ پارٹنرشپ نے شمالی ریاض میں میونسپل اراضی کی مشترکہ سرمایہ کاری کے منصوبے کے لیے اظہارِ دلچسپی، پری کوالیفکیشن اور تجاویز جمع کرانے کے مراحل شروع کر دیے ہیں۔ نجی شعبے کے ساتھ 50 سالہ شراکت داری میونسپلٹی کا اس طرز کا پہلا منصوبہ ہے۔

اضافی زمین کی فراہمی سے درمیانی مدت میں قیمتوں کا دباؤ کم ہو سکتا ہے، بشرطیکہ پلاٹوں کا محلِ وقوع اور رقبہ حقیقی طلب کے مطابق ہو۔ اس سے ڈویلپرز، ٹھیکیداروں، انجینئرنگ کمپنیوں اور تعمیراتی سامان فراہم کرنے والوں کے لیے بھی کام کے مواقع پیدا ہو سکتے ہیں۔

رئیل اسٹیٹ ڈویلپر احمد عمر باسودان نے میڈیا سے گفتگو کرتے ہوئے کہا کہ صرف مکانات اور پلاٹوں کی تعداد بڑھانا مارکیٹ کے مسائل حل کرنے کے لیے کافی نہیں۔ ان کے مطابق رہائش خریداروں کی استطاعت کے مطابق ہونی چاہیے، اس کے ساتھ مناسب محلِ وقوع، بنیادی سہولیات اور انفراسٹرکچر کی دستیابی اور تعمیراتی لاگت پر قابو بھی ضروری ہے۔ انہوں نے کہا کہ نئی زمین اور نجی منصوبے بڑھتی آبادی اور شہری پھیلاؤ کے تناظر میں رسد اور طلب میں توازن قائم کرنے کی کوششوں کا حصہ ہیں۔