عالمی ریئل اسٹیٹ خبریں

لندن | ری نیوز انٹرنیشنل ڈیسک نیوز
ایم اینڈ جی یورپین پراپرٹی فنڈ نے یورپ میں رئیل اسٹیٹ سرمایہ کاری کو مزید وسعت دینے کیلئے 500 ملین یورو مالیت کا اپنا پہلا گرین بانڈ کامیابی سے جاری کر دیا ہے۔
پانچ سالہ گرین بانڈ کو عالمی سرمایہ کاروں کی جانب سے بھرپور پذیرائی ملی، جس کیلئے 120 سے زائد سرمایہ کاروں کی جانب سے 2.1 ارب یورو سے زیادہ کے آرڈرز موصول ہوئے۔ حتمی قیمت مقرر ہونے پر یہ بانڈ 2.8 گنا زیادہ سبسکرائب ہوا۔
کمپنی کے مطابق بانڈ سے حاصل ہونے والی رقم نئی سرمایہ کاری، رئیل اسٹیٹ منصوبوں کی خریداری، ری فنانسنگ اور ماحول دوست منصوبوں کیلئے استعمال کی جائے گی۔
تقریباً 5.4 ارب یورو کے اثاثوں پر مشتمل ایم اینڈ جی یورپین پراپرٹی فنڈ یورپ کے اہم رئیل اسٹیٹ فنڈز میں شامل ہے، جو دفاتر، لاجسٹکس، ریٹیل اور رہائشی شعبوں میں سرمایہ کاری کرتا ہے۔
فنڈ کے تحت موجودہ وقت میں 2.4 ارب یورو مالیت کے اثاثے گرین فنانس فریم ورک کے معیار پر پورا اترتے ہیں، جبکہ اس فریم ورک کو سسٹین ایبل فچ کی جانب سے بہترین درجہ بندی دی گئی ہے۔
ایم اینڈ جی کے مطابق گرین بانڈ کی کامیاب فروخت سرمایہ کاروں کے اعتماد اور یورپی رئیل اسٹیٹ مارکیٹ میں طویل مدتی مواقع کی عکاسی کرتی ہے۔
فنڈ سے حاصل ہونے والی رقم ایسے منصوبوں پر خرچ کی جائے گی جن کا مقصد عمارتوں کی توانائی بچت، ماحولیاتی کارکردگی اور پائیداری کو بہتر بنانا ہے۔
گزشتہ 12 ماہ کے دوران ایم اینڈ جی یورپین پراپرٹی فنڈ نے 11 مختلف سودوں کے ذریعے ایک ارب یورو سے زائد کی سرمایہ کاری کے وعدے کیے ہیں، جن میں زیادہ توجہ لاجسٹکس اور رہائشی شعبوں پر رہی۔
کمپنی کے مطابق کئی یورپی مارکیٹس میں معیاری رئیل اسٹیٹ کی طلب اور نئی سپلائی کی محدود دستیابی سرمایہ کاری کے نئے مواقع پیدا کر رہی ہے۔

امریکا کی ہاؤسنگ مارکیٹ کی پائیدار بحالی کا انحصار رہن قرضوں کی شرحِ سود میں کمی پر ہوگا۔ رئیل اسٹیٹ ایجنٹس کے ایک سروے کے مطابق بلند قرضہ جاتی اخراجات خریداروں اور فروخت کنندگان، دونوں کی سرگرمیوں کو متاثر کر رہے ہیں۔

رئیل ریمیکس گروپ کا ایجنٹ آپٹیمزم انڈیکس، جو صفر سے 100 کے پیمانے پر ایجنٹس کے آئندہ 12 ماہ کے بارے میں اعتماد کو جانچتا ہے، ستمبر میں کم ہو کر 45.8 رہ گیا، جبکہ اگست میں یہ 54.3 تھا۔ انڈیکس میں کمی سے ظاہر ہوتا ہے کہ ایجنٹس کو تشویش ہے کہ رہن قرضوں کی بلند شرحِ سود مزید خریداروں کو مارکیٹ میں آنے سے روکے گی۔

ادارے کے حالیہ ماہانہ سروے میں 177 ایجنٹس میں سے 65 فیصد نے کہا کہ خریداروں کی طلب میں نمایاں اضافے کے لیے 30 سالہ رہن قرضوں کی شرحِ سود 6 فیصد سے کم ہونا ضروری ہے۔ 37 فیصد ایجنٹس کے خیال میں شرحِ سود 5.5 فیصد سے نیچے آنی چاہیے۔ بلند شرحِ سود کے اثرات پہلے ہی ہاؤسنگ سرگرمیوں پر دکھائی دے رہے ہیں۔ سروے میں شامل دو تہائی ایجنٹس نے بتایا کہ خریدار گھر کی تلاش روک رہے ہیں یا اسے مؤخر کر رہے ہیں۔ فروخت کنندگان بھی انتظار کر رہے ہیں۔ 39 فیصد ایجنٹس کے مطابق ممکنہ فروخت کنندگان نے اپنے گھر فروخت کے لیے پیش کرنے کا منصوبہ ملتوی کر دیا ہے۔

مارکیٹ کی سست روی کے باعث بعض فروخت کنندگان قیمت اور شرائط میں نرمی دکھا رہے ہیں۔ 35 فیصد ایجنٹس نے بتایا کہ فروخت کنندگان اپنی مطلوبہ قیمت کم کر رہے ہیں، جبکہ 34 فیصد کے مطابق وہ خریداروں کو راغب کرنے کے لیے اضافی رعایتیں بھی دے رہے ہیں۔

قیمتوں کے بارے میں توقعات بھی کمزور ہو رہی ہیں۔ اگر رہن قرضوں کی شرحِ سود اگلے سال بھی تقریباً 7 فیصد رہی تو سروے میں شامل تقریباً 60 فیصد ایجنٹس کو گھروں کی قیمتوں میں کمی کا امکان ہے۔ لگ بھگ 33 فیصد ایجنٹس نے قیمتوں میں 5 فیصد سے زیادہ کمی کی توقع ظاہر کی۔

ریئل ریمیکس گروپ کے چیئرمین اور چیف ایگزیکٹو تمیر پولیگ نے سروے کے نتائج کے ساتھ جاری بیان میں کہا ہے کہ ’’رہن قرضوں کی بلند شرحِ سود پہلے ہی مشکلات سے دوچار ہاؤسنگ مارکیٹ پر مزید دباؤ ڈال رہی ہے۔‘‘

پولیگ کے مطابق خریداروں کو اب مذاکرات میں زیادہ برتری حاصل ہے، تاہم گھروں کی قیمتوں تک رسائی اور ادائیگی کی استطاعت اب بھی بڑی رکاوٹ ہے، جس کے باعث بہت سے افراد گھر کی تلاش مؤخر کر رہے ہیں۔ انہوں نے کہا کہ ہاؤسنگ سرگرمیوں کی پائیدار بحالی کا انحصار رہن قرضوں کی شرحِ سود میں بامعنی کمی پر ہوگا۔

سروے کے نتائج گولڈمین سیکس کی 2027 کے لیے امریکی ہاؤسنگ مارکیٹ کی پیش گوئی سے بھی مطابقت رکھتے ہیں۔ ادارے کے ماہرینِ معاشیات کو موجودہ گھروں کی فروخت اور نئے گھروں کی تعمیر میں کمی کا امکان ہے۔ ان کے اندازے کے مطابق اگلے سال موجودہ گھروں کی فروخت 3.9 ملین رہ سکتی ہے، جبکہ قیمتوں میں معمولی، یعنی 0.8 فیصد اضافہ متوقع ہے۔

گولڈمین سیکس کے ماہرینِ معاشیات رونی واکر اور ڈیوڈ میرکل کے مطابق جن گھر مالکان نے 2020 اور 2021 میں کم شرحِ سود پر اپنے رہن قرضوں کی نئی شرائط طے کی تھیں، انہیں موجودہ بلند شرحوں کے ماحول میں گھر منتقل ہونے پر نمایاں مالی لاگت کا سامنا ہو سکتا ہے۔