تاریخ اشاعت: May 15, 2026 - 12:30 PM
Citizen Gets Possession of Plot After 29 Years Following Federal Ombudsman’s Intervention
وفاقی محتسب کی مداخلت سے 29 سال بعد شہری کو پلاٹ کا قبضہ مل گیا
▫️رحیم یار خان کے رہائشی مرزا حبیب اللہ خان نے 1997 میں کے آر ایل ایمپلائز ہاوسنگ سوسائٹی سے پلاٹ خریدا تھا، تمام واجبات ادا کرنے کے باوجود قبضہ نہ مل سکا
وفاقی محتسب نوید کامران بلوچ کی مداخلت سے کے آر ایل ایمپلائز ہاوسنگ سوسائٹی نے ضلع رحیم یار خان کے ایک شہری کو 29 سال بعد پلاٹ الاٹ کر کے اس کا قبضہ دے دیا۔ طویل عرصے تک دفتروں اور سوسائٹی کے چکر لگانے والے شکایت کنندہ نے اپنا حق ملنے پر وفاقی محتسب اور ان کے افسران کا شکریہ ادا کیا ہے۔
تفصیلات کے مطابق ضلع رحیم یار خان کے ایک نواحی گاؤں کے رہائشی مرزا حبیب اللہ خان نے 1997 میں روات، اسلام آباد میں واقع کے آر ایل ایمپلائز ہاؤسنگ سوسائٹی سے ایک پلاٹ خریدا تھا۔ درخواست گزار کے مطابق انہوں نے پلاٹ کے تمام واجبات ادا کر دیے تھے اور انہیں قبضے کا لیٹر بھی جاری کیا گیا، تاہم موقع پر پلاٹ کا قبضہ نہیں دیا گیا۔
شکایت کنندہ تقریباً 29 سال تک سوسائٹی اور مختلف متعلقہ دفاتر کے چکر لگاتے رہے، مگر انہیں ان کا حق نہ مل سکا۔ اسی دوران مرزا حبیب اللہ خان فالج کا شکار بھی ہو گئے، تاہم بیماری کے باوجود وہ اپنے پلاٹ کے حصول کے لیے کوششیں جاری رکھتے رہے۔
ہر طرف سے مایوس ہونے کے بعد شکایت کنندہ نے وفاقی محتسب سے رجوع کیا۔ وفاقی محتسب کے دفتر میں تنازعات کے غیر رسمی حل کے پروگرام، آئی آر ڈی، کے تحت کیس درج کیا گیا اور کوآپریٹو ہاوسنگ سوسائٹیز ڈیپارٹمنٹ سمیت متعلقہ سوسائٹی سے رپورٹ طلب کی گئی۔
وفاقی محتسب میں کیس کی متعدد سماعتوں کے بعد بالآخر سوسائٹی نے شکایت کنندہ کو 31 مارچ 2026 کو بلاک ڈی میں 10 مرلے کا کارنر پلاٹ نمبر 362 الاٹ کر دیا اور اس کا قبضہ بھی فراہم کر دیا۔
شکایت کنندہ نے 4 مئی 2026 کو اپنے شکریے کے خط کے ساتھ تصدیق کی کہ وفاقی محتسب کی مداخلت سے انہیں 29 سال بعد ان کا حق مل گیا ہے۔ انہوں نے کہا کہ اگر وفاقی محتسب کا ادارہ موجود نہ ہوتا تو انہیں کبھی اپنا حق نہ مل پاتا۔