تاریخ اشاعت: May 15, 2026 - 4:30 PM
Punjab Government Decides to Repeal Consolidation of Holdings Ordinance 1960, Plans New Law
پنجاب حکومت کا کنسولیڈیشن آف ہولڈنگز آرڈیننس 1960 ختم کرنے کا فیصلہ، نیا قانون لانے کی تیاری
▫️بورڈ آف ریونیو نے کنسولیڈیشن آف ہولڈنگز ایکٹ 2026 کا مسودہ تیار کر لیا، اراضی یکجائی کے پرانے نظام کو مرحلہ وار ختم کرنے کی تجویز دیدی گئی
پنجاب حکومت نے صوبے میں اراضی یکجائی کے پرانے قانونی نظام کو ختم کرنے کا فیصلہ کر لیا ہے، جس کے تحت کنسولیڈیشن آف ہولڈنگز آرڈیننس 1960 کو منسوخ کر کے نیا قانون نافذ کرنے کی تیاری شروع کر دی گئی ہے۔ اس مقصد کے لیے بورڈ آف ریونیو پنجاب نے کنسولیڈیشن آف ہولڈنگز ایکٹ 2026 کا مسودہ تیار کر لیا ہے۔
ذرائع کے مطابق نئے قانونی مسودے میں اراضی یکجائی کے پرانے نظام کو مرحلہ وار ختم کرنے کی تجویز دی گئی ہے، تاکہ کئی دہائیوں سے زیر التوا ریونیو معاملات کو نمٹایا جا سکے اور زمینوں کے ریکارڈ کو جدید تقاضوں کے مطابق بہتر بنایا جا سکے۔
مسودے کے تحت جن علاقوں میں کنسولیڈیشن سکیمیں مکمل ہو چکی ہیں، وہاں ریکارڈ کی تکمیل اور عملی اقدامات ایک سال کے اندر مکمل کیے جائیں گے۔ اسی طرح جن منصوبوں پر 70 فیصد تک کام مکمل ہو چکا ہے، ان کا باقی کام 180 دن میں مکمل کرنے کی سفارش کی گئی ہے۔
نئے قانون میں یہ بھی تجویز کیا گیا ہے کہ جن موضع جات میں کنسولیڈیشن سکیموں پر 70 فیصد سے کم پیشرفت ہوئی ہے، انہیں ڈی نوٹیفائی کر دیا جائے، تاکہ غیر مکمل اور طویل عرصے سے رکی ہوئی سکیموں کے باعث پیدا ہونے والی انتظامی پیچیدگیوں کو کم کیا جا سکے۔
حکام کے مطابق مجوزہ قانون کا مقصد ریونیو نظام میں بہتری، اراضی ریکارڈ کی درستگی، زیر التوا معاملات کے حل اور عوام کو درپیش مشکلات میں کمی لانا ہے۔ نئے اقدامات سے زمینوں کی ملکیت، انتقالات اور ریکارڈ سے متعلق مسائل کو زیادہ شفاف اور منظم انداز میں نمٹانے میں مدد ملے گی۔
بورڈ آف ریونیو کی جانب سے تیار کردہ مسودہ محکمہ قانون و پارلیمانی امور کو بھجوایا جائے گا، جہاں قانونی ویٹنگ کے بعد اسے حتمی شکل دی جائے گی۔ منظوری کے بعد نیا قانون صوبے بھر میں نافذ کیا جائے گا۔