تاریخ اشاعت: May 18, 2026 - 1:00 PM
One Constitution Avenue Case, Appeals of 20 Apartment Sub Lease Holders to Be Heard Today
ون کانسٹی ٹیوشن ایونیو کیس، 20 اپارٹمنٹ سب لیز ہولڈرز کی اپیلوں پر سماعت آج ہو گی
▫️اپیل کنندگان نے تھرڈ پارٹی رائٹس کے تحفظ کے لیے سنگل بنچ کے فیصلے کے پیراگراف 30 کی حد تک انٹرا کورٹ اپیلیں دائر کر رکھی ہیں
اسلام آباد کے ون کانسٹی ٹیوشن ایونیو کیس میں مزید 20 اپارٹمنٹ سب لیز ہولڈرز کی انٹرا کورٹ اپیلوں پر سماعت آج اسلام آباد ہائیکورٹ میں ہو گی۔ جسٹس اعظم خان اور جسٹس انعام امین منہاس پر مشتمل ڈویژن بنچ اپیلوں کی سماعت کرے گا۔
یہ اپیلیں ون کانسٹی ٹیوشن ایونیو کی لیز منسوخی سے متعلق سی ڈی اے کے فیصلے کے خلاف دائر مقدمے کے تناظر میں سامنے آئی ہیں۔ اسلام آباد ہائیکورٹ کے سنگل بنچ نے اس سے قبل سی ڈی اے کی جانب سے ون کانسٹی ٹیوشن ایونیو کی لیز منسوخی کے فیصلے کے خلاف بی این پی کمپنی کی درخواست مسترد کر دی تھی۔
سابق ایئر چیف مجاہد انور خان، سابق صدر آئی سی سی احسان مانی سمیت 20 اپیل کنندگان نے تھرڈ پارٹی رائٹس کے تحفظ کے لیے اسلام آباد ہائیکورٹ کے سنگل بنچ کے فیصلے کے پیراگراف 30 کی حد تک انٹرا کورٹ اپیلیں دائر کی ہیں۔
اپیل کنندگان کا مؤقف ہے کہ وہ اپارٹمنٹ سب لیز ہولڈرز ہیں، اس لیے ان کے حقوق کا تحفظ کیا جانا ضروری ہے۔ کیس کی سماعت کے دوران عدالت سنگل بنچ کے فیصلے کے متعلقہ حصے اور اپیل کنندگان کے مؤقف کا جائزہ لے گی۔