تاریخ اشاعت: November 20, 2026 - 1:01 AM
Government Approves 25-Year Public-Private Partnership for Two Sections of Sukkur Hyderabad M 6 Motorway
سکھر حیدرآباد ایم سکس موٹروے کے دو سیکشنز کی تعمیر کے لیے 25 سالہ پبلک پرائیویٹ پارٹنرشپ کی منظوری
▫️ نجکاری کمیشن بورڈ نے 121 کلومیٹر طویل موٹروے کے دو سیکشنز کے لیے الگ الگ معاہدوں کی منظوری دے دی، نجی سرمایہ کار تعمیر، فنانسنگ اور آپریشن کے ذمہ دار ہوں گے
نجکاری کمیشن بورڈ نے سکھر حیدرآباد ایم سکس موٹروے کے پہلے اور دوسرے سیکشن کی تعمیر کے لیے الگ الگ کنسیشن معاہدوں کی منظوری دے دی ہے، جن کی مجموعی لمبائی 121 کلومیٹر ہے۔
منصوبے کے پہلے سیکشن کو مالی طور پر قابلِ عمل بنانے اور ٹول ٹیکس مناسب رکھنے کے لیے حکومت وائبلٹی گیپ فنڈنگ (VGF) فراہم کرے گی۔ نجی سرمایہ کار 25 سالہ معاہدے کے دوران ٹول ٹیکس کی وصولی سے اپنی سرمایہ کاری واپس حاصل کریں گے۔ ایشیائی ترقیاتی بینک منصوبے کے لیے ٹرانزیکشن ایڈوائزر کی خدمات انجام دے رہا ہے، جبکہ این ایچ اے مقامی اور غیر ملکی سرمایہ کاروں سے مسابقتی بولیاں طلب کرے گی۔
مجوزہ ایم سکس موٹروے کی مجموعی لمبائی 306 کلومیٹر ہوگی، جو پانچ سیکشنز اور چھ رویہ سڑک پر مشتمل ہوگی۔ منصوبے کی تکمیل سے حیدرآباد اور سکھر کے درمیان سفر کا دورانیہ تقریباً چھ گھنٹے سے کم ہو کر تین گھنٹے رہنے کی توقع ہے۔ نئی موٹروے موجودہ مصروف این فائیو قومی شاہراہ کا متبادل فراہم کرے گی، جس سے سفری تحفظ، علاقائی رابطوں اور تجارتی سامان کی نقل و حمل میں بہتری متوقع ہے۔