تاریخ اشاعت: April 13, 2026 - 10:30 AM
Proposal to restrict GOR I Lahore residences to senior Central Civil Service officers
جی او آر ون لاہور میں رہائش گاہوں کو صرف سینئر سنٹرل سروس افسران تک محدود کرنے کی تجویز
▫️صوبائی افسران کا ڈی ایچ اے فیز 9 منتقلی کے پلان پر تحفظات اور بے چینی کا اظہار ، اندرونی کہانی سامنے آ گئی
لاہور | ری نیوز پاکستان مال روڈ پر واقع گورنمنٹ آفیسرز ریزیڈنس (جی او آر ون) میں سرکاری رہائش گاہوں کی ممکنہ ازسرِنو تقسیم سے متعلق اہم پیش رفت سامنے آئی ہے، جس کے تحت صوبائی سروس کے افسران کو وہاں سے منتقل کرنے کی تجویز زیر غور ہے۔ ...
مال روڈ پر واقع گورنمنٹ آفیسرز ریزیڈنس (جی او آر ون) میں سرکاری رہائش گاہوں کی ممکنہ ازسرِنو تقسیم سے متعلق اہم پیش رفت سامنے آئی ہے، جس کے تحت صوبائی سروس کے افسران کو وہاں سے منتقل کرنے کی تجویز زیر غور ہے۔
ذرائع کے مطابق جی او آر ون، جہاں تقریباً 175 سرکاری رہائش گاہیں موجود ہیں، طویل عرصے سے اعلیٰ سرکاری افسران کی رہائش گاہ کے طور پر استعمال ہو رہا ہے۔ اس علاقے میں 18 سے 24 کنال تک کے وسیع و عریض مکانات، وزیراعلیٰ ہاؤس پر مشتمل متعدد رہائشیں، صوبائی وزراء کے لیے مختص مکانات، ججز کرام کی رہائش گاہیں، اور گریڈ 21 اور گریڈ 22 کے اعلیٰ افسران سمیت آئی جی پنجاب، ڈی سی لاہور اور ڈی آئی جی لاہور کی سرکاری رہائشیں بھی شامل ہیں۔
اندرونی ذرائع کا کہنا ہے کہ اعلیٰ سنٹرل سول سروس کے بعض سینئر افسران نے تجویز دی ہے کہ جی او آر ون کو صرف وفاقی بیوروکریسی کے اعلیٰ افسران تک محدود کر دیا جائے، جبکہ پنجاب مینجمنٹ سروس (پی ایم ایس) اور دیگر صوبائی سروسز کے افسران کو متبادل رہائش فراہم کی جائے۔
اس ضمن میں ڈی ایچ اے فیز 9 میں زیر تعمیر یا مکمل ہونے والے تقریباً 27 گھروں کو صوبائی افسران کی منتقلی کے لیے زیر غور لایا جا رہا ہے۔ تاہم اس مجوزہ اقدام پر صوبائی افسران میں تشویش پائی جا رہی ہے۔
ذرائع کے مطابق بعض افسران کا مؤقف ہے کہ اگر وہ جی او آر ون کی رہائش گاہیں خالی بھی کر دیتے ہیں تو اس بات کی کوئی ضمانت نہیں کہ مستقبل میں انہیں ڈی ایچ اے فیز 9 میں فراہم کی جانے والی رہائشوں سے بھی منتقل ہونے کا سامنا نہیں کرنا پڑے گا۔
تاحال اس حوالے سے کوئی باضابطہ حکومتی اعلامیہ سامنے نہیں آیا، تاہم بیوروکریسی کے اندر اس ممکنہ فیصلے پر مشاورت جاری ہے۔