تاریخ اشاعت: April 18, 2026 - 9:45 AM
Restoration of Railway Links Begins in Various Districts of Khyber Pakhtunkhwa
خیبرپختونخوا کے مختلف اضلاع میں ریلوے رابطوں کی بحالی کا کام شروع
▫️پہلے مرحلے میں پشاور، نوشہرہ اور جہانگیرہ کے درمیان 62 کلومیٹر اہم ٹریک پر کام ہوگا
پشاور | ری نیوز پاکستان وفاقی منظوری کے بعد خیبرپختونخوا کے مختلف اضلاع میں ٹرین سروس کی بحالی کے لیے عملی اقدامات شروع کر دیے گئے ہیں، جو صوبے میں ریلوے رابطوں کی بحالی کی جانب ایک اہم پیش رفت قرار دی جا رہی ہے۔ ذرائع کے مطابق پاک...
وفاقی منظوری کے بعد خیبرپختونخوا کے مختلف اضلاع میں ٹرین سروس کی بحالی کے لیے عملی اقدامات شروع کر دیے گئے ہیں، جو صوبے میں ریلوے رابطوں کی بحالی کی جانب ایک اہم پیش رفت قرار دی جا رہی ہے۔
ذرائع کے مطابق پاکستان ریلوے نے بحالی منصوبے پر باقاعدہ پیش رفت کا آغاز کر دیا ہے اور اس حوالے سے صوبائی حکومت کو بھی آگاہ کر دیا گیا ہے۔ اس اقدام کا مقصد اہم علاقوں کو دوبارہ ریلوے نیٹ ورک سے منسلک کرنا اور ٹرانسپورٹ کے نظام کو بہتر بنانا ہے۔
پہلے مرحلے میں 62 کلومیٹر طویل پشاور، نوشہرہ اور جہانگیرہ کے درمیان ریلوے ٹریک کی بحالی پر کام کیا جائے گا، جسے مجوزہ نیٹ ورک کا مرکزی حصہ قرار دیا جا رہا ہے۔
دوسرے مرحلے میں نوشہرہ، مردان اور درگئی کے درمیان 65 کلومیٹر طویل ٹریک کی بحالی شامل ہے۔ اس کے علاوہ مردان سے چارسدہ کے درمیان 27 کلومیٹر اور پشاور سے جمرود تک 18 کلومیٹر طویل ریلوے لائن بھی منصوبے کا حصہ ہے۔
ذرائع کا کہنا ہے کہ بعد کے مرحلے میں کوہاٹ سے جند تک 60 کلومیٹر طویل ریلوے سیکشن کو بھی اپ گریڈ کیا جائے گا۔ اس دوران پاکستان ریلوے کے ورکنگ گروپ میں نمائندگی کے لیے تکنیکی ماہرین کی نامزدگی کا عمل بھی جاری ہے۔
حکام کے مطابق ریلوے سروس کی بحالی سے مسافروں کو سستی، محفوظ اور مؤثر سفری سہولیات میسر آئیں گی، جبکہ تجارتی سرگرمیوں کو بھی فروغ ملے گا اور پاکستان ریلوے کی آمدن میں اضافہ ہوگا۔
انہوں نے مزید بتایا کہ بحالی سے قبل قانونی تقاضے مکمل کیے جا رہے ہیں جبکہ متعلقہ علاقوں میں تجاوزات کے خاتمے کے لیے کارروائیاں بھی شروع کر دی گئی ہیں تاکہ ریلوے ٹریک کی بحالی کا عمل بلا رکاوٹ مکمل کیا جا سکے۔