تاریخ اشاعت: April 23, 2026 - 4:00 PM
Protecting the Earth is Essential to Ensure a Safe Future for Coming Generations: NA Speaker Ayaz Sadiq
زمین کا تحفظ آئندہ نسلوں کے محفوظ مستقبل کی ضمانت ہے: ایاز صادق سپیکر قومی اسمبلی
▫️پاکستان کو ماحولیاتی آفات سے اربوں ڈالر نقصان، گلیشیئرز کے پگھلاؤ سے سیلابی خدشات میں اضافہ
سپیکر قومی اسمبلی سردار ایاز صادق نے کہا ہے کہ زمین کا تحفظ آنے والی نسلوں کے محفوظ مستقبل کے لیے ناگزیر ہے، جبکہ موسمیاتی تبدیلی پوری دنیا کے لیے ایک بڑا چیلنج بن چکی ہے۔ انہوں نے اس امر پر زور دیا کہ کرۂ ارض کے تحفظ کے لیے عوام میں شعور بیدار کرنا ہم سب کی مشترکہ ذمہ داری ہے۔
زمین کے عالمی دن کے موقع پر اپنے پیغام میں انہوں نے کہا کہ پاکستان ان ممالک میں شامل ہے جو ماحولیاتی تبدیلیوں سے شدید متاثر ہو رہے ہیں۔ موسمیاتی آفات کے باعث ملک کو 30 ارب ڈالر سے زائد کا نقصان اٹھانا پڑا، جبکہ 2022 کے تباہ کن سیلاب سے 3 کروڑ سے زیادہ افراد متاثر ہوئے اور انفراسٹرکچر کو بھی اربوں ڈالر کا نقصان پہنچا۔
انہوں نے مزید کہا کہ حالیہ برسوں میں پاکستان کے اوسط درجہ حرارت میں نمایاں اضافہ دیکھنے میں آیا ہے، جو بڑھتے ہوئے ماحولیاتی خطرات کی واضح علامت ہے۔ ہمالیہ اور قراقرم کے گلیشیئرز تیزی سے پگھل رہے ہیں، جس کے نتیجے میں سیلاب کے خدشات بڑھتے جا رہے ہیں۔
سپیکر نے اس بات پر بھی روشنی ڈالی کہ پاکستان دنیا کے ان ممالک میں شامل ہے جہاں گرین ہاؤس گیسوں کا اخراج نہایت کم ہے، اس کے باوجود ملک موسمیاتی تبدیلی کے اثرات سے بری طرح متاثر ہو رہا ہے۔ انہوں نے عالمی برادری پر زور دیا کہ وہ ماحولیاتی چیلنجز سے نمٹنے کے لیے مشترکہ اقدامات کو یقینی بنائے۔