تاریخ اشاعت: April 24, 2026 - 11:00 AM
NESPAK Clears Officials in ADB Funded Power Project Bid Evaluation
نیسپاک نے اے ڈی بی کی مالی معاونت سے جاری پاور پراجیکٹ کی بولیوں کے جائزے میں ملوث افسران کو بری الذمہ قرار دیدیا
▫️سینیٹ کمیٹی کی مبینہ بے ضابطگیوں اور ٹھیکے کی الاٹمنٹ کے عمل کی تحقیقات جاری
نیشنل انجینئرنگ سروسز پاکستان لمیٹڈ (نیسپاک) نے کہا ہے کہ ایشیائی ترقیاتی بینک (اے ڈی بی) کے تعاون سے جاری اے سی ایس آر بنٹنگ کنڈکٹرز منصوبے کی بولیوں کے جائزے میں کسی بھی افسر کے ملوث ہونے یا بدعنوانی کا کوئی ثبوت نہیں ملا۔
یہ معاملہ اس وقت سینیٹ کی قائمہ کمیٹی برائے اقتصادی امور کے زیر غور ہے، جو بولی کے عمل میں مبینہ بے ضابطگیوں کی تحقیقات کر رہی ہے۔ خدشات ظاہر کیے گئے تھے کہ کچھ افسران نے ٹھیکہ دینے کے عمل میں کسی مخصوص کمپنی کو فائدہ پہنچایا۔ یہ معاملہ ابتدائی طور پر سینیٹ کی قائمہ کمیٹی برائے پاور میں، سینیٹر سیف اللہ ابڑو کے چیئرمینی کے دور میں ٹھایا گیا تھا، تاہم بعد ازاں مزید پیش رفت کے بعد اسے اقتصادی امور کمیٹی میں بھی زیر بحث لایا گیا۔
12 فروری 2026 کو قائمہ کمیٹی برائے اقتصادی امور نے اقتصادی امور ڈویژن (ای اے ڈی) اور نیسپاک کو ہدایت کی تھی کہ ٹھیکے کی منظوری میں ملوث افسران کے خلاف کارروائی کی جائے اور جلد از جلد جامع رپورٹ پیش کی جائے۔ کمیٹی نے خاص طور پر اس بات پر تشویش کا اظہار کیا کہ اے ڈی بی کے منصوبے کے تحت ٹھیکہ تیسرے کم ترین بولی دہندہ کو کیوں دیا گیا، جس سے شفافیت اور قواعد کی پاسداری پر سوالات اٹھے۔
مزید برآں، کمیٹی نے سوات میں اکرم واہ کینال کی بہتری اور بحالی کے منصوبے کے لیے قائم جوائنٹ وینچر سے متعلق تفصیلات بھی طلب کی ہیں۔ اس میں نیسپاک اور ایسوسی ایٹڈ کنسلٹنگ انجینئرنگ (اے سی ای) لمیٹڈ کے درمیان شراکت داری اور اس جوائنٹ وینچر کی اہلیت کے معیار کا جائزہ بھی شامل ہے۔
تحقیقات تاحال جاری ہیں اور توقع ہے کہ سینیٹ کمیٹی مزید شواہد اور رپورٹس کا جائزہ لینے کے بعد حتمی نتائج مرتب کرے گی۔