تاریخ اشاعت: April 29, 2026 - 10:15 AM
Transparent Tendering Saves Rs 28 Billion in Punjab Development Projects, Revealed in PDP Review Meeting
شفاف ٹینڈرنگ سے پنجاب کے ترقیاتی منصوبوں میں 28 ارب روپے کی بچت ہوئی, پی ڈی پی جائزہ اجلاس میں انکشاف
▫️2050 تک کیلئے جامع شہری ماسٹر پلان تیار کر لیا گیا جو پائیدار ترقی کی راہ ہموار کرے گا، صوبائی وزیر بلدیات
حکومتِ پنجاب نے مختلف ترقیاتی منصوبوں میں شفاف ٹینڈرنگ کے عمل کے ذریعے 28 ارب روپے کی نمایاں بچت حاصل کرلی ہے۔ یہ انکشاف پنجاب ڈویلپمنٹ پروگرام (پی ڈی پی) کے جائزہ اجلاس میں کیا گیا، جس کی صدارت صوبائی وزیر بلدیات ذیشان رفیق نے کی۔
اجلاس کے دوران وزیر بلدیات نے کہا کہ اس بڑی بچت سے حکومتی شفافیت، مؤثر منصوبہ بندی اور وسائل کے بہتر استعمال کی عکاسی ہوتی ہے۔ انہوں نے بتایا کہ شہروں کیلئے منظور شدہ 55 سکشن مشینوں میں سے 46 حاصل کرلی گئی ہیں، جبکہ 55 جیٹنگ مشینوں اور 100 ڈی واٹرنگ سیٹس کی خریداری کا عمل جاری ہے۔ اسی طرح 77 ڈی سلٹنگ مشینوں کی خریداری آخری مراحل میں داخل ہوچکی ہے۔
انہوں نے زور دیا کہ جدید مشینری کی فراہمی سے بالخصوص مون سون کے دوران شہری سیلاب کے مسائل پر قابو پانے میں مدد ملے گی۔ وزیر بلدیات کے مطابق وزیراعلیٰ پنجاب مریم نواز کی ہدایات پر شہروں میں زیر زمین واٹر سٹوریج ٹینکس کا جال بچھایا جا رہا ہے، جو سڑکوں کے کنارے تعمیر کیے جائیں گے تاکہ بارش کے پانی کی فوری نکاسی ممکن ہو سکے اور ذخیرہ شدہ پانی کو ضرورت کے وقت استعمال میں لایا جا سکے۔
ذیشان رفیق نے مزید بتایا کہ نکاسی آب کے نظام کو بہتر بنانے کیلئے 61 موجودہ ڈسپوزل سٹیشنز کی بحالی کے ساتھ ساتھ 56 نئے اسٹیشنز بھی تعمیر کیے جائیں گے۔ انہوں نے کہا کہ پی ڈی پی کے تحت 2050 تک کے لیے جامع شہری ماسٹر پلان بھی تیار کر لیا گیا ہے، جو پائیدار ترقی کی راہ ہموار کرے گا۔
انہوں نے یہ بھی انکشاف کیا کہ پائپ لائننگ کی جدید ٹیکنالوجی پاکستان منتقل کر دی گئی ہے اور مختلف شہروں میں اس کے پلانٹس نصب کیے جا رہے ہیں۔ "خوبصورت پنجاب" پروگرام کے تحت لوکل گورنمنٹ ڈیپارٹمنٹ کی نگرانی میں 51 شہروں میں ترقیاتی کام تیزی سے جاری ہیں، جن کا مقصد شہری انفراسٹرکچر کی بہتری اور عوام کو بہتر سہولیات کی فراہمی ہے۔