تاریخ اشاعت: April 29, 2026 - 6:00 PM
State Bank Eases Lending Conditions Under ‘Apna Ghar Program’
سٹیٹ بینک نے “اپنا گھر پروگرام” کے تحت قرضہ دینے کی شرائط نرم کر دیں
▫️درخواستوں کی منظوری کیلئے 15 دن کی مدت مقرر، متوسط طبقے کیلئے گھر بنانے میں آسانی متوقع
سٹیٹ بینک آف پاکستان (ایس بی پی) نے حکومت کے “وزیراعظم اپنا گھر پروگرام – گھر ہو تو اپنا” کے تحت ہاؤسنگ فنانس کے فروغ اور عملدرآمد کو تیز کرنے کیلئے نئی سہولتیں متعارف کرا دی ہیں، جن کے تحت قرضہ جاتی شرائط میں نرمی اور پراسیسنگ کے وقت کو محدود کیا گیا ہے۔
جاری کردہ سرکلر کے مطابق مرکزی بینک نے بینکوں اور ہاؤس بلڈنگ فنانس کمپنی لمیٹڈ (ایچ بی ایف سی ایل) کو قرض دہندگان کی جانچ پڑتال اور درخواستوں کی پراسیسنگ میں زیادہ لچک فراہم کر دی ہے تاکہ سکیم سے زیادہ سے زیادہ افراد مستفید ہو سکیں۔
نظرثانی شدہ فریم ورک کے تحت قرض لینے والے کی ماہانہ ادائیگیوں، جن میں زیر غور ہاؤسنگ فنانس اور دیگر کنزیومر قرضوں کی اقساط شامل ہیں ، کو اس کی خالص قابلِ تصرف آمدنی کے 65 فیصد تک محدود رکھا گیا ہے۔ اس اقدام کا مقصد ایک جانب قرض تک رسائی کو بڑھانا ہے تو دوسری جانب مالیاتی نظم و ضبط کو برقرار رکھنا ہے۔
ایس بی پی نے جائیداد کی ویلیوایشن کے عمل کو بھی آسان بنا دیا ہے۔ 50 لاکھ روپے تک مالیت کی جائیداد کیلئے بینک اور ایچ بی ایف سی ایل اپنی داخلی صلاحیتوں کے تحت تخمینہ لگا سکیں گے، جبکہ اس سے زائد مالیت کی جائیداد کیلئے پاکستان بینکس ایسوسی ایشن (پی بی اے) سے منظور شدہ پینل کے کم از کم ایک ویلیوایٹر سے تشخیص لازمی قرار دی گئی ہے۔
درخواستوں کے بروقت فیصلے کو یقینی بنانے کیلئے بینکوں اور ایچ بی ایف سی ایل کو ہدایت کی گئی ہے کہ مکمل معلومات کے ساتھ درخواست موصول ہونے کے بعد 15 ورکنگ دنوں کے اندر کریڈٹ منظوری کا عمل مکمل کیا جائے۔
مرکزی بینک نے تمام متعلقہ اداروں کو ہدایت کی ہے کہ وہ ان نئی ہدایات پر سختی سے عملدرآمد یقینی بنائیں تاکہ سکیم کے نفاذ میں شفافیت اور اثر انگیزی برقرار رکھی جا سکے۔
یہ اقدامات حکومت کی جانب سے ہاؤسنگ سیکٹر کو متحرک کرنے، معاشی سرگرمیوں کو فروغ دینے اور ملک میں کم لاگت رہائش کی بڑھتی ہوئی طلب کو پورا کرنے کی وسیع حکمت عملی کا حصہ ہیں۔