تاریخ اشاعت: May 6, 2026 - 11:00 AM
Government Reviews New Strategy to Achieve Target of 500,000 Housing Loans Under Prime Minister’s Apna Ghar Programme
وزیراعظم اپنا گھر پروگرام کے تحت 5 لاکھ ہاؤسنگ لونز کا ہدف، نئی حکمتِ عملی پر غور شروع
▫️اقتصادی رابطہ کمیٹی کے اجلاس میں ملٹی چینل اپروچ، ضمنی گرانٹس اور مختلف ترقیاتی منصوبوں کا جائزہ لیا گیا
حکومت نے وزیراعظم اپنا گھر پروگرام کے تحت 5 لاکھ ہاؤسنگ لونز کا ہدف حاصل کرنے کے لیے نئی حکمتِ عملی پر غور شروع کر دیا ہے۔ ذرائع کے مطابق اس مقصد کے لیے ملٹی چینل اپروچ زیر غور ہے، جس کے تحت درخواست دہندگان کو قرضوں تک رسائی آسان بنانے اور پروگرام پر عملدرآمد کو تیز کرنے کے امکانات کا جائزہ لیا جا رہا ہے۔
ذرائع کے مطابق اقتصادی رابطہ کمیٹی کا اجلاس وزیر خزانہ کی زیر صدارت اسلام آباد میں ہوا، جس میں مختلف اہم منصوبوں، پالیسی اقدامات اور ضمنی گرانٹس کی منظوری سے متعلق امور پر غور کیا گیا۔ اجلاس میں وزیراعظم اپنا گھر پروگرام کی نئی حکمتِ عملی پر تفصیلی تبادلہ خیال کیا گیا، جبکہ 5 لاکھ ہاؤسنگ لونز کے ہدف کے حصول کے لیے مختلف مالیاتی اور انتظامی راستوں کا جائزہ لیا گیا۔
اجلاس کے ایجنڈے میں ہائر ایجوکیشن کمیشن کے لیے 10 کروڑ روپے کی ضمنی گرانٹ، نارووال میں فیض احمد فیض کمپلیکس منصوبے اور دانش اسکول کُری اسلام آباد کے لیے 35 کروڑ روپے کی منظوری بھی شامل تھی۔
اجلاس میں الیکٹرک گاڑیوں کے فروغ کے لیے پالیسی کے دوسرے مرحلے کے آغاز، وزیراعظم آفس کے لیے 47 کروڑ 90 لاکھ روپے کی ضمنی گرانٹ اور داخلہ ڈویژن کی جانب سے مختلف فنڈز سے متعلق سمریاں بھی زیر غور آئیں۔
مزید برآں جدید پاسپورٹ سسٹم کے لیے 2 ارب 50 کروڑ روپے کی گرانٹ کی تجویز پیش کی گئی، جبکہ نیشنل سٹیل کمپلیکس کی بحالی کے لیے گیس فراہمی کے معاملے پر پیٹرولیم ڈویژن کی جانب سے بریفنگ دی گئی۔
اجلاس میں توانائی، صنعت، تعلیم، ثقافت اور رہائشی سہولتوں سے متعلق اہم امور کا جائزہ لیتے ہوئے متعلقہ حکام کو مزید پیش رفت کے لیے ہدایات جاری کی گئیں۔