تاریخ اشاعت: May 9, 2026 - 10:30 AM
CDA Declares 99 Housing and Agro Farming Schemes Illegal in Islamabad
اسلام آباد میں 99 ہاؤسنگ اور ایگرو فارمنگ سکیمیں غیر قانونی قرار دیدی گئیں
▫️سی ڈی اے کی زون III اور IV میں غیر منظور شدہ سوسائٹیوں میں سرمایہ کاری سے گریز کی ہدایت
کیپیٹل ڈیولپمنٹ اتھارٹی (سی ڈی اے) نے اسلام آباد میں قائم 99 ہاؤسنگ اور ایگرو فارمنگ سکیموں کو غیر قانونی قرار دیتے ہوئے ان کے خلاف کارروائی کا باضابطہ اعلان کر دیا ہے۔
سی ڈی اے کی جانب سے جاری کردہ سرکاری نوٹس کے مطابق یہ سکیمیں وفاقی دارالحکومت کے زون III اور IV میں واقع ہیں اور بغیر لازمی این او سی (NOC) اور پلاننگ منظوری حاصل کیے پلاٹس کی تشہیر، مارکیٹنگ اور فروخت میں ملوث پائی گئیں۔ اتھارٹی کے مطابق یہ سرگرمیاں سی ڈی اے آرڈیننس 1960 اور آئی سی ٹی زوننگ ریگولیشنز 1992 کی کھلی خلاف ورزی ہیں۔
سی ڈی اے نے شہریوں کو خبردار کیا ہے کہ وہ ان سکیموں میں سرمایہ کاری یا خرید و فروخت سے گریز کریں کیونکہ ایسی سرمایہ کاری قانونی اور مالی خطرات کا باعث بن سکتی ہے۔ اتھارٹی نے متعلقہ سپانسرز اور ڈویلپرز کو فوری طور پر تمام تشہیری مہمات، بکنگ اور فروخت کی سرگرمیاں بند کرنے کی ہدایت بھی جاری کی ہے۔
غیر قانونی قرار دی جانے والی نمایاں ہاؤسنگ سکیموں میں لہتراڑ روڈ پر رائل سٹی ہاؤسنگ سکیم، کرپا میں جاپانی ویلی، غوری گارڈنز، سٹی ٹاؤن، اور سملی ڈیم روڈ پر واقع سملی ویلی فیز I اور II شامل ہیں۔ حکام کے مطابق ان منصوبوں نے زوننگ، انفراسٹرکچر اور ماحولیاتی تقاضوں سے متعلق لازمی پلاننگ منظوری حاصل نہیں کی۔
نوٹس میں ہورنو تھنڈا پانی میں دھنیال ٹاؤن، لہتراڑ روڈ پر گکھڑ ٹاؤن، اسامہ ٹاؤن، کُری روڈ پر عبداللہ گارڈنز اور پارک روڈ کے قریب کینٹربری انکلیو کو بھی شامل کیا گیا ہے۔ سی ڈی اے نے خبردار کیا کہ ان منصوبوں کی مارکیٹنگ یا فروخت میں ملوث افراد کے خلاف شہری ترقیاتی قوانین کے تحت قانونی کارروائی کی جا سکتی ہے۔
اتھارٹی نے مزید کئی منصوبوں کو زوننگ قوانین کی خلاف ورزی کا مرتکب قرار دیا ہے، جن میں اسلام آباد ہائی وے پر قرطبہ ٹاؤن، فلاور ویلی میں کومنرز سکائی گارڈن، پنڈ بیگوال میں مظفر آباد ٹاؤن، لہتراڑ سملی ڈیم لنک روڈ پر مدینہ انکلیو فیز I، اسٹار ولاز ہاؤسنگ سکیم، اور علی پور فراش کے قریب سیف گارڈنز شامل ہیں۔
غیر منظور شدہ سکیموں کی فہرست میں بابر انکلیو (موضع نور)، ڈاکٹرز انکلیو (پارک روڈ)، گرین ایونیو II (کُری روڈ)، حماد ٹاؤن (موضع موہریاں)، مروہ ٹاؤن (اسلام آباد ہائی وے)، میڈیا سٹی-1 (کرپا روڈ) اور پیراڈائز پوائنٹ ہاؤسنگ سکیم (لہتراڑ روڈ) بھی شامل ہیں۔
اس کے علاوہ گورنمنٹ آفیسرز کوآپریٹو ہاؤسنگ سکیم، بدر فارمز، گرین فیلڈ، شاہین فارمز، کوہسار انکلیو، علی ٹاؤن اور گرین میڈوز (نارتھ رج) کو بھی مطلوبہ قانونی تقاضے پورے نہ کرنے پر غیر قانونی قرار دیا گیا ہے۔
مزید جن سکیموں کا نام نوٹس میں شامل ہے ان میں الریان سوسائٹی، بنی گالہ برج کے قریب راجہ فاروق کی اسپانسرڈ لینڈ سب ڈویژن، کتسرز ولاز (ڈی-12 شاہ اللہ دتہ)، میجر مخدوم سوسائٹی، گرین ہلز، آرکیڈیا سٹی، آریان انکلیو (کورنگ روڈ)، عادل ویلی، عادل فارمز، السید ایونیو اور الریمان سٹی ویو شامل ہیں۔
فہرست میں شامل دیگر منصوبوں میں الریمان ولاز، الہدیٰ ٹاؤن، علی ماڈل ٹاؤن، ایشین رینچز ولاز، ارسلان ٹاؤن، ابو بکر ٹاؤن، امیر خان انکلیو، بلیو انکلیو/ سٹار ہوم، برما ٹاؤن، بائیلی ٹاؤن، بارہ کہو انکلیو، بنی گالہ ہل ویو، سٹی ویو، سٹی ٹاؤن اور کیپیٹل گارڈنز شامل ہیں۔
سی ڈی اے نے ایک بار پھر واضح کیا ہے کہ اسلام آباد میں صرف منظور شدہ ہاؤسنگ منصوبوں کو قانونی حیثیت حاصل ہے۔ اتھارٹی نے شہریوں کو ہدایت کی کہ کسی بھی ہاؤسنگ اسکیم میں سرمایہ کاری سے قبل اس کی قانونی حیثیت ضرور چیک کریں، جبکہ غیر قانونی تعمیرات اور غیر منظور شدہ منصوبوں کے خلاف کارروائیاں جاری رکھنے کے عزم کا بھی اعادہ کیا گیا۔