تاریخ اشاعت: May 13, 2026 - 2:00 PM
Islamabad High Court Seeks CDA Response on Appeal Filed by One Constitution Avenue Apartment Owners
ون کانسٹی ٹیوشن ایونیو اپارٹمنٹ مالکان کی اپیل پر اسلام آباد ہائیکورٹ کا سی ڈی اے کو نوٹس، جواب طلب
▫️سی ڈی اے کو تھرڈ پارٹی حقوق کا تحفظ کرتے ہوئے پلان آف ایکشن دینے کی ہدایت کی گئی تھی، معاملہ نیب اور ایف آئی اے کے دائرہ کار میں آتا ہے، وکیل کا مؤقف
اسلام آباد ہائیکورٹ نے ون کانسٹی ٹیوشن ایونیو کے اپارٹمنٹ مالکان کی انٹرا کورٹ اپیل پر کیپٹل ڈویلپمنٹ اتھارٹی، سی ڈی اے، کو نوٹس جاری کرتے ہوئے جواب طلب کر لیا ہے۔
جسٹس محمد اعظم خان اور جسٹس انعام امین منہاس پر مشتمل اسلام آباد ہائیکورٹ کے ڈویژن بینچ نے اپارٹمنٹ مالکان کی جانب سے دائر انٹرا کورٹ اپیل پر سماعت کی۔ دوران سماعت عدالت نے معاملے کے قانونی پہلوؤں، سپریم کورٹ کے سابقہ حکم نامے اور سی ڈی اے کے کردار سے متعلق اہم سوالات اٹھائے۔
سماعت کے دوران جسٹس انعام امین منہاس نے ریمارکس دیے کہ سپریم کورٹ کے 2019 کے حکم نامے کی واضح خلاف ورزی سامنے آئی ہے، ایسی صورتحال میں اس کے کیا نتائج ہوں گے؟ عدالت نے اس نکتے پر سی ڈی اے سے وضاحت طلب کی ہے۔
اپارٹمنٹ مالکان کی جانب سے سردار تیمور اسلم ایڈووکیٹ عدالت میں پیش ہوئے۔ انہوں نے مؤقف اختیار کیا کہ سی ڈی اے کو ہدایت کی گئی تھی کہ تھرڈ پارٹی کے حقوق کا تحفظ کرتے ہوئے ایک واضح پلان آف ایکشن پیش کرے، تاہم اس معاملے میں مزید قانونی پہلو بھی موجود ہیں۔
وکیل نے عدالت کو بتایا کہ سی ڈی اے اس معاملے کو براہ راست نہیں چھیڑے گا کیونکہ یہ معاملہ نیب اور ایف آئی اے کے دائرہ کار میں بھی آتا ہے۔ انہوں نے مزید کہا کہ وزیر اعظم کی جانب سے اس حوالے سے ایک کمیٹی تشکیل دی گئی ہے، جس کی سفارشات سامنے آنے کے بعد معاملہ وفاقی کابینہ کی منظوری کے لیے پیش کیا جائے گا۔
عدالت نے ابتدائی دلائل سننے کے بعد سی ڈی اے کو نوٹس جاری کرتے ہوئے جواب طلب کر لیا اور کیس کی مزید سماعت آئندہ تاریخ تک ملتوی کر دی۔