تاریخ اشاعت: April 27, 2026 - 2:00 PM
Lahore: Crackdown Intensified Against Buildings Constructed Without Parking Facilities
لاہور میں پارکنگ سہولت کے بغیر تعمیر شدہ عمارتوں کے خلاف کریک ڈاؤن تیز
▫️رائل پارک اور لکشمی چوک میں قوانین کی خلاف ورزی پر کارروائی، متعدد تعمیرات کی نشاندہی
لاہور میں پارکنگ کی مناسب سہولت کے بغیر تعمیر کی جانے والی عمارتوں کے خلاف انتظامیہ نے کارروائیاں تیز کر دی ہیں۔
لاہور ڈویلپمنٹ اتھارٹی (ایل ڈی اے) کے ایم او پلاننگ ڈاکٹر رائے امتیاز کی ہدایت پر داتا گنج بخش زون میں خصوصی آپریشنز کیے گئے، جن کے دوران رائل پارک اور لکشمی چوک کے علاقوں میں بلڈنگ قوانین کی خلاف ورزی کرنے والی تعمیرات کی نشاندہی کی گئی۔
انتظامیہ کے مطابق 6 افراد کے خلاف بلڈنگ ایس او پیز کی خلاف ورزی پر باقاعدہ استغاثے تیار کر کے تھانہ قلعہ گجر سنگھ میں جمع کرا دیے گئے ہیں۔ یہ افراد منظور شدہ نقشوں کے برعکس تعمیرات کر رہے تھے اور پارکنگ کے لیے مختص جگہ بھی فراہم نہیں کی گئی تھی۔
ڈاکٹر رائے امتیاز نے کہا ہے کہ پارکنگ کی عدم دستیابی شہریوں کے لیے شدید ٹریفک مسائل کا باعث بنتی ہے، جس کے پیش نظر اس طرح کی خلاف ورزیوں کے خلاف سخت اور بلا امتیاز کارروائی جاری رہے گی۔