تاریخ اشاعت: November 21, 2026 - 5:01 PM
Rawalpindi Launches Murree Road Repairs and Beautification Work Under Rs4 Billion Development Programme
راولپنڈی میں 4 ارب روپے کے ترقیاتی پروگرام کے تحت مری روڈ کی مرمت اور تزئین و آرائش کا کام شروع
▫️ فیض آباد سے لیاقت باغ تک مری روڈ کی بحالی،6 روڈ اور چاندنی چوک فلائی اوورز کی سڑکوں کی مرمت بھی جاری
پنجاب ہائی وے ڈیپارٹمنٹ نے راولپنڈی میں فیض آباد سے لیاقت باغ تک مری روڈ کی مرمت اور بحالی کا کام شروع کر دیا ہے، جس میں 6 روڈ اور چاندنی چوک فلائی اوورز کے خستہ حال حصوں کی مرمت بھی شامل ہے۔
وزیراعلیٰ پنجاب مریم نواز شریف کے متوقع دورے سے قبل شروع ہونے والے ان اقدامات پر شہریوں نے اطمینان کا اظہار کیا ہے، تاہم ان کا کہنا ہے کہ کئی برسوں سے خستہ حال سڑکوں کی مرمت پہلے ہی کی جانی چاہیے تھی۔ شہریوں نے کمیٹی چوک انڈر پاس اور راول روڈ کی فوری بحالی کا بھی مطالبہ کیا، جہاں سڑکوں کی خراب حالت کے باعث روزانہ سفر کرنے والوں کو مشکلات کا سامنا ہے۔
ضلعی انتظامیہ کے حکام کے مطابق سڑکوں کی بحالی اور تزئین و آرائش کا کام وزیراعلیٰ کے دورے سے مخصوص نہیں بلکہ پہلے سے منظورشدہ ترقیاتی منصوبے کا حصہ ہے۔ حکام نے بتایا کہ راولپنڈی میں تقریباً 4 ارب روپے مالیت کے ترقیاتی منصوبوں پر کام جاری ہے، جن میں چائنہ مارکیٹ، سیدپور روڈ اور سکسٹھ روڈ کی تعمیر و مرمت بھی شامل ہے۔ جاری مرمتی کام دسمبر تک مکمل کرنے کا ہدف مقرر کیا گیا ہے، جبکہ نومبر کے اختتام سے قبل مزید سڑکوں پر کام شروع کیا جائے گا۔