تاریخ اشاعت: May 2, 2026 - 11:40 AM
Provincial Minister Faisal Ayub Khokhar Inaugurates Rs 110 Million Nawab Town Sports Complex
صوبائی وزیر فیصل ایوب کھوکھر نے نواب ٹاؤن 11 کروڑ روپے کی لاگت سے مکمل سپورٹس کمپلیکس کا افتتاح کر دیا
▫️پنجاب بھر میں 188 سپورٹس کمپلیکس اور 1000 گراؤنڈز کی تعمیر کا منصوبہ جاری
پنجاب کے وزیر برائے کھیل و امورِ نوجوانان فیصل ایوب کھوکھر نے لاہور میں نواب ٹاؤن کرکٹ اسپورٹس کمپلیکس کا افتتاح کر دیا۔ یہ منصوبہ 11 کروڑ روپے کی لاگت سے مکمل کیا گیا ہے، جس کا مقصد علاقے کے نوجوانوں کو صحت مند اور مثبت سرگرمیوں کے مواقع فراہم کرنا ہے۔
افتتاحی تقریب میں صوبائی وزراء بلال یاسین، سہیل شوکت بٹ اور شیر علی گورچانی کے علاوہ وزیراعلیٰ کے مشیر ذیشان ملک، ڈائریکٹر جنرل سپورٹس پنجاب محمد طارق قریشی اور دیگر اعلیٰ حکام نے شرکت کی۔
میڈیا سے گفتگو کرتے ہوئے فیصل ایوب کھوکھر نے کہا کہ یہ سپورٹس کمپلیکس وزیراعلیٰ پنجاب مریم نواز شریف کی جانب سے علاقے کے کھیلوں کے شائقین کے لیے ایک تحفہ ہے۔ انہوں نے بتایا کہ اس جدید سہولت میں جاگنگ ٹریک، کھیل کا میدان، ائیرکنڈیشنڈ پویلین اور جدید طرز کے چینجنگ رومز شامل ہیں۔
انہوں نے مزید کہا کہ صوبائی حکومت کھیلوں کے فروغ کے لیے بھرپور اقدامات کر رہی ہے، جس کے تحت پنجاب بھر میں 188 ملٹی پرپز اسپورٹس کمپلیکس تعمیر کیے جا رہے ہیں جبکہ 1000 گراؤنڈز کی تعمیر کا کام بھی جاری ہے تاکہ نچلی سطح پر کھیلوں کو فروغ دیا جا سکے اور نوجوانوں کو مثبت سرگرمیوں کی جانب راغب کیا جا سکے۔
اسی موقع پر نواب ٹاؤن گراؤنڈ میں پنجاب کابینہ الیون اور آفیسرز الیون کے درمیان نمائشی کرکٹ میچ بھی کھیلا گیا، جس میں پنجاب کابینہ الیون نے شاندار کارکردگی دکھاتے ہوئے آفیسرز الیون کو 37 رنز سے شکست دے دی۔