تاریخ اشاعت: May 8, 2026 - 2:47 PM
KP Chief Minister Launches Rs 25 Billion Development Package in Mansehra
وزیراعلیٰ خیبر پختونخوا کا مانسہرہ کیلئے 25 ارب روپے کے ترقیاتی پیکج کا اعلان
▫️18.5 ارب روپے کے گریویٹی فلو واٹر سپلائی منصوبے، ہیلتھ انسٹی ٹیوٹ، ڈیم اور سپورٹس منصوبوں سمیت 12 بڑے ترقیاتی منصوبوں کا افتتاح اور سنگِ بنیاد رکھ دیا گیا
وزیراعلیٰ خیبر پختونخوا محمد سہیل خان آفریدی نے بدھ کے روز ضلع مانسہرہ کے دورے کے موقع پر 25 ارب روپے سے زائد مالیت کے 12 بڑے ترقیاتی منصوبوں کا افتتاح اور سنگِ بنیاد رکھا، جسے خطے کیلئے حالیہ برسوں کا ایک بڑا ترقیاتی پیکج قرار دیا جا رہا ہے۔
یہ منصوبے بنیادی عوامی سہولیات کی بہتری اور ضلع میں مجموعی ترقی کے فروغ کیلئے شروع کیے گئے ہیں، جن میں صاف پانی کی فراہمی، صحت، تعلیم، کھیلوں اور شہری سہولیات پر خصوصی توجہ دی گئی ہے۔
حکومت کے مطابق ان اقدامات سے عوام کے معیارِ زندگی میں نمایاں بہتری آئے گی جبکہ پسماندہ علاقوں کو ترقی کے دھارے میں شامل کرنے میں مدد ملے گی۔
اہم منصوبوں میں 18.5 ارب روپے کا مانسہرہ گریویٹی فلو واٹر سپلائی سکیم، 2 ارب روپے کا انسٹی ٹیوٹ آف الائیڈ ہیلتھ سائنسز، 1.8 ارب روپے کا اچھڑ نالہ ڈیم اور ایک ارب روپے کی لاگت سے تھاکرا سٹیڈیم کی اپ گریڈیشن شامل ہیں۔
ترقیاتی پیکج میں بی ایچ یو سندیسر کی اپ گریڈیشن، پانو ڈھیری میں ریسکیو اسٹیشن کا قیام، گورنمنٹ ڈگری کالج برائے طلبہ کا افتتاح اور جدید کیتھ لیب کے قیام کیلئے سنگِ بنیاد بھی شامل ہے۔
اس کے علاوہ قبرستان کیلئے اراضی مختص کرنے، کوٹکے پارک کے قیام، مانسہرہ واٹر سپلائی اسکیم کی بہتری اور تحصیل تناول کے قیام جیسے منصوبے بھی ترقیاتی پیکج کا حصہ ہیں۔
افتتاحی تقریب سے خطاب کرتے ہوئے وزیراعلیٰ نے کہا کہ یہ منصوبے مانسہرہ کے عوام کیلئے حکومت کا تحفہ ہیں اور ان سے روزمرہ زندگی میں عملی بہتری آئے گی۔
انہوں نے کہا کہ صوبے کے تمام اضلاع کی متوازن ترقی حکومت کی اولین ترجیح ہے اور عوامی وسائل کو شفاف اور منصفانہ انداز میں استعمال کیا جا رہا ہے تاکہ زیادہ سے زیادہ عوامی فلاح یقینی بنائی جا سکے۔
وزیراعلیٰ نے کہا کہ صحت، تعلیم، صاف پانی اور کھیلوں سمیت اہم شعبوں میں اصلاحات کا عمل جاری ہے جبکہ دور دراز اور محروم علاقوں تک ترقی کے ثمرات پہنچانے کیلئے خصوصی اقدامات کیے جا رہے ہیں۔
انہوں نے اس عزم کا بھی اعادہ کیا کہ تمام منصوبے میرٹ، شفافیت اور معیاری تعمیراتی اصولوں کے مطابق مکمل کیے جائیں گے تاکہ مقامی آبادی کو دیرپا فوائد حاصل ہو سکیں۔