تاریخ اشاعت: May 12, 2026 - 3:19 PM
Work Accelerates on Model Village Project in Vehari Under “Suthra Punjab” Vision; 14 Villages to Be Equipped with Modern Facilities
وہاڑی میں “سوہنا پنجاب” وژن کے تحت مثالی گاؤں پراجیکٹ پر کام تیز، 14 دیہات جدید سہولیات سے آراستہ کیے جائیں گے
▫️ڈپٹی کمشنر خالد جاوید گورائیہ کا چک نمبر 91 اور 81 ڈبلیو بی کا دورہ، ترقیاتی کاموں کی رفتار اور معیار کا جائزہ لیا
وزیراعلیٰ پنجاب مریم نواز شریف کے وژن “سوہنا پنجاب” کے تحت ضلع وہاڑی میں مثالی گاؤں پراجیکٹ پر تیزی سے کام جاری ہے، جس کے تحت دیہی علاقوں کو جدید بنیادی سہولیات سے آراستہ کرنے کے لیے عملی اقدامات کیے جا رہے ہیں۔
ڈپٹی کمشنر وہاڑی خالد جاوید گورائیہ نے چک نمبر 91 ڈبلیو بی اور چک نمبر 81 ڈبلیو بی کا دورہ کیا، جہاں انہوں نے مثالی گاؤں پراجیکٹ کے تحت جاری ترقیاتی کاموں کی رفتار اور معیار کا جائزہ لیا۔ دورے کے دوران ڈپٹی کمشنر نے متعلقہ افسران کو منصوبے پر کام مزید تیز کرنے کی ہدایت کی۔
ڈپٹی کمشنر نے اہلِ علاقہ سے بھی ملاقات کی اور مثالی گاؤں پراجیکٹ کے تحت جاری کاموں کے بارے میں رائے دریافت کی، جس پر مقامی افراد نے اطمینان کا اظہار کیا۔
اس موقع پر ڈپٹی کمشنر خالد جاوید گورائیہ نے کہا کہ وزیراعلیٰ پنجاب مریم نواز شریف دیہاتوں کو مثالی گاؤں میں تبدیل کرنے کا واضح عزم رکھتی ہیں۔ انہوں نے کہا کہ مثالی گاؤں پراجیکٹ کا بنیادی مقصد دیہی آبادی کو جدید سہولیات فراہم کرنا، دیہی ترقی کو فروغ دینا اور عوام کے معیارِ زندگی کو بہتر بنانا ہے۔
ضلعی انتظامیہ کے مطابق ضلع وہاڑی میں ایک ارب 89 کروڑ 50 لاکھ روپے کی لاگت سے 14 مثالی گاؤں بنائے جا رہے ہیں۔ منصوبے کے تحت واٹر سپلائی، ڈرینج سسٹم، ویسٹ واٹر ٹریٹمنٹ، چلڈرن پارکس، پختہ گلیوں اور سٹریٹ لائٹس سمیت دیگر بنیادی سہولیات کی فراہمی پر کام جاری ہے۔
دورے کے موقع پر ایڈیشنل ڈپٹی کمشنر فنانس و ڈپٹی ڈائریکٹر ڈویلپمنٹ محمد افضال، اسسٹنٹ کمشنر وہاڑی انعم اکرم، ڈویژنل کوآرڈینیٹر مثالی گاؤں اورنگزیب سمیت دیگر افسران بھی موجود تھے۔