تاریخ اشاعت: May 4, 2026 - 12:15 PM
Progress Accelerates on Faisalabad Mass Transit System, Punjab Chief Minister Orders Faster Construction Pace
فیصل آباد ماس ٹرانزٹ سسٹم پر پیش رفت تیز، وزیراعلیٰ پنجاب کی تعمیراتی رفتار بڑھانے کی ہدایت
▫️جدید سہولیات کا حامل 20.5 کلومیٹر طویل منصوبہ 21 سٹیشنز پر مشتمل، اہم مقامات پر ایلی ویٹڈ روٹس شامل
وزیراعلیٰ پنجاب مریم نواز کی زیر صدارت ایک اہم اجلاس میں فیصل آباد ماس ٹرانزٹ سسٹم پر پیش رفت کا تفصیلی جائزہ لیا گیا۔ اجلاس میں متعلقہ حکام نے منصوبے کی موجودہ صورتحال، ڈیزائن اور آئندہ کے لائحہ عمل پر بریفنگ دی۔
وزیراعلیٰ نے منصوبے کی اہمیت کو مدنظر رکھتے ہوئے ہدایت جاری کی کہ ماس ٹرانزٹ سسٹم کے تعمیراتی عمل کو مزید تیز کیا جائے تاکہ شہریوں کو جلد از جلد جدید اور معیاری سفری سہولیات فراہم کی جا سکیں۔ انہوں نے اس بات پر زور دیا کہ منصوبے کی تکمیل میں کسی قسم کی تاخیر برداشت نہیں کی جائے گی۔
بریفنگ کے دوران بتایا گیا کہ یہ ماس ٹرانزٹ سسٹم مجموعی طور پر 20.5 کلومیٹر طویل ہوگا، جس میں 21 سٹیشنز قائم کیے جائیں گے۔ منصوبے کے تحت 11.3 کلومیٹر کا روٹ ایلی ویٹڈ (بلند) ہوگا، جبکہ اس حصے پر 11 سٹیشنز تعمیر کیے جائیں گے، جس سے شہری ٹریفک کے دباؤ میں کمی آئے گی اور سفر زیادہ تیز اور محفوظ ہو سکے گا۔
وزیراعلیٰ مریم نواز نے ہدایت دی کہ تمام سٹیشنز پر جدید اور وسیع ایلی ویٹرز نصب کیے جائیں تاکہ بزرگوں، خواتین اور خصوصی افراد کے لیے آسانی پیدا کی جا سکے۔ انہوں نے اس بات کو بھی یقینی بنانے کا حکم دیا کہ منصوبے کے اطراف میں موجود کھلی جگہوں پر اربن فارسٹ اور سبزہ لگایا جائے، تاکہ شہر کے ماحول کو بہتر بنایا جا سکے اور ماحولیاتی آلودگی میں کمی لائی جا سکے۔
مزید بتایا گیا کہ منصوبے کے ڈپو فیصل ٹاؤن فیصل آباد اور ایئرپورٹ چوک فیصل آباد میں قائم کیے جائیں گے، جہاں سے سسٹم کی آپریشنل سرگرمیوں کو کنٹرول کیا جائے گا۔
حکام کے مطابق یہ منصوبہ فیصل آباد میں پبلک ٹرانسپورٹ کے نظام میں ایک بڑی تبدیلی کا باعث بنے گا، جس سے نہ صرف سفری سہولیات بہتر ہوں گی بلکہ شہری ترقی اور معاشی سرگرمیوں کو بھی فروغ ملے گا۔