تاریخ اشاعت: May 15, 2026 - 4:45 PM
Housing Society Victims Raise a Flood of Complaints at NAB Open Court; Nova City Affectees Stage Protest
نیب کھلی کچہری میں ہاؤسنگ سوسائٹیز کے متاثرین کی شکایات کے انبار، نووا سٹی متاثرین کا احتجاج
▫️چیئرمین نیب نذیر احمد بٹ اور ڈی جی نیب راولپنڈی/اسلام آباد نے متاثرین کی شکایات سنیں، ازالے اور ذمہ داروں کے خلاف کارروائی کی یقین دہانی
قومی احتساب بیورو کے راولپنڈی/اسلام آباد دفتر میں مختلف ہاؤسنگ سوسائٹیز کے متاثرین کے لیے کھلی کچہری کا انعقاد کیا گیا، جس میں شہریوں کی بڑی تعداد نے اپنی شکایات پیش کیں اور ہاؤسنگ منصوبوں میں سرمایہ کاری کے بعد پلاٹس نہ ملنے، رقوم کی واپسی میں تاخیر اور مبینہ بے ضابطگیوں کے خلاف آواز اٹھائی۔
کھلی کچہری کے دوران چیئرمین نیب لیفٹیننٹ جنرل ریٹائرڈ نذیر احمد بٹ اور ڈی جی نیب راولپنڈی/اسلام آباد وقار احمد چوہان نے متاثرین کی شکایات سنیں۔ نیب ذرائع کے مطابق قومی احتساب بیورو متاثرین کی درخواستوں اور فراہم کردہ شواہد کا جائزہ لے گا، شکایات کے ازالے کے لیے کارروائی کی جائے گی اور ذمہ دار عناصر کے خلاف قانون کے مطابق اقدامات کیے جائیں گے۔
اس موقع پر نووا سٹی اسلام آباد کے متاثرین نے نیب دفتر کے باہر احتجاجی مظاہرہ بھی کیا۔ مظاہرین نے نووا سٹی کی فائلز، بینرز اور دستاویزات اٹھا رکھی تھیں، جبکہ وہ پلاٹس کی فراہمی یا لوٹی گئی رقوم کی واپسی کے لیے نعرے بازی کرتے رہے۔ متاثرین کا کہنا تھا کہ نووا سٹی میں سرمایہ کاری کرنے والے ہزاروں شہری کئی برسوں سے مشکلات کا شکار ہیں، مگر انہیں تاحال انصاف فراہم نہیں کیا جا سکا۔
مظاہرین کے مطابق انہوں نے سوسائٹی انتظامیہ کی یقین دہانیوں پر باقاعدہ رقوم جمع کروائیں، جس کے بعد انہیں الاٹمنٹ لیٹرز بھی جاری کیے گئے جن میں پلاٹ نمبرز اور دیگر تفصیلات درج تھیں، تاہم اب انہیں پلاٹس دینے سے انکار کیا جا رہا ہے۔ متاثرین نے الزام عائد کیا کہ سوسائٹی انتظامیہ نے شہریوں کی زمین اور سرمایہ دیگر منصوبوں میں منتقل کر دیا، جس کے باعث سرمایہ کار آج بھی اپنے حق کے حصول کے لیے دربدر ہیں۔
احتجاج میں شریک متاثرین کا کہنا تھا کہ وہ گزشتہ کئی برسوں سے مختلف اداروں کے چکر لگا رہے ہیں، مگر انہیں کہیں سے مؤثر ریلیف نہیں ملا۔ انہوں نے کہا کہ شہریوں نے اپنی جمع پونجی، زیورات اور زندگی بھر کی کمائی بہتر مستقبل اور بچوں کی ضروریات کے لیے پلاٹس کی صورت میں لگائی تھی، لیکن آج وہ شدید ذہنی اذیت اور مالی مشکلات کا سامنا کر رہے ہیں۔
متاثرین نے نیب اور متعلقہ حکام سے مطالبہ کیا کہ انہیں فوری طور پر ان کے پلاٹس فراہم کیے جائیں، بصورت دیگر موجودہ مارکیٹ ویلیو کے مطابق ان کی رقوم واپس کی جائیں، تاکہ برسوں سے جاری مالی اور قانونی مشکلات کا خاتمہ ہو سکے۔