تاریخ اشاعت: June 1, 2026 - 10:00 AM
Property Certificate Made Mandatory for Property Ownership in Lahore
لاہور میں جائیداد کی ملکیت کے لیے پراپرٹی سرٹیفکیٹ لازمی قرار
▫️پراپرٹی سرٹیفکیٹ کے نام پر کوئی علیحدہ فیس یا ٹیکس مقرر نہیں، شہری اضافی وصولیوں سے ہوشیار رہیں: حکومت پنجاب
حکومت پنجاب نے جائیداد کی ملکیت اور قبضے کی قانونی تصدیق کے لیے پراپرٹی سرٹیفکیٹ کے اجراء کا اعلان کیا ہے، جسے لاہور کی ہاؤسنگ سکیموں میں ملکیت کی اہم قانونی دستاویز قرار دیا گیا ہے۔
حکومتی اعلامیے کے مطابق یکم جولائی 2026 سے لاہور کی تمام ہاؤسنگ سکیموں، بشمول نجی ہاؤسنگ سکیموں، میں جائیداد کی قانونی تصدیق کے لیے پراپرٹی سرٹیفکیٹ کو بنیادی دستاویز کے طور پر استعمال کیا جائے گا۔ اس اقدام کا مقصد جائیداد کے ریکارڈ کو محفوظ، شفاف اور آن لائن تصدیق کے قابل بنانا ہے۔
حکومت پنجاب نے واضح کیا ہے کہ پراپرٹی سرٹیفکیٹ کے نام پر کوئی علیحدہ فیس یا ٹیکس مقرر نہیں کیا گیا۔ حکام کے مطابق بعض عناصر جائیداد کی خرید و فروخت کے دوران شہریوں سے پراپرٹی سرٹیفکیٹ کے نام پر اضافی رقم وصول کرنے کی کوشش کر رہے ہیں، حالانکہ اس حوالے سے کوئی اضافی سرکاری چارج عائد نہیں کیا گیا۔
اعلامیے میں شہریوں کو ہدایت کی گئی ہے کہ وہ اپنی جائیداد کے حقوق کے تحفظ کے لیے صرف مستند پراپرٹی سرٹیفکیٹ حاصل کریں۔ یہ سرٹیفکیٹ زمین کی ملکیت، قبضے اور ریکارڈ کی جانچ کے لیے ایک اہم دستاویز ہوگا، جس کے ذریعے جائیداد سے متعلق تنازعات اور جعل سازی کے امکانات کو کم کیا جاسکے گا۔
حکومت کے مطابق جولائی 2026 سے کاغذی انتقالات اور روایتی ملکیتی کاغذات کی جگہ ڈیجیٹل پراپرٹی سرٹیفکیٹ متعارف کرایا جائے گا۔ اس نظام کے تحت جائیداد کے ریکارڈ کو ڈیجیٹل شکل میں محفوظ کیا جائے گا، جبکہ شہری اپنی ملکیت کی تصدیق آن لائن بھی کر سکیں گے۔
حکام کا کہنا ہے کہ نادرا اور دیگر ڈیجیٹل سسٹمز کے ذریعے شہریوں کی شناخت اور جائیداد کا ریکارڈ زیادہ محفوظ بنایا جائے گا۔ اس اقدام سے غیر قانونی انتقالات، جعلی دستاویزات اور ملکیت کے تنازعات میں کمی متوقع ہے۔
حکومت پنجاب نے عوام پر زور دیا ہے کہ جائیداد کی خرید و فروخت کے دوران کسی بھی غیر ضروری فیس، مشکوک مطالبے یا غیر قانونی وصولی سے ہوشیار رہیں۔ شہریوں کو ہدایت کی گئی ہے کہ اگر کوئی فرد یا ادارہ پراپرٹی سرٹیفکیٹ کے نام پر اضافی رقم طلب کرے تو اس کی شکایت فوری طور پر متعلقہ سرکاری اداروں کو رپورٹ کی جائے۔
حکام کے مطابق پراپرٹی سرٹیفکیٹ کا مقصد عوام کے جائیدادی حقوق کا تحفظ، لین دین میں شفافیت اور زمین کے ریکارڈ کو جدید تقاضوں کے مطابق محفوظ بنانا ہے۔