تاریخ اشاعت: June 1, 2026 - 12:55 PM
LDA Seals 170 Properties in Major Operation Against Illegal Commercial Buildings
ایل ڈی اے کا غیر قانونی کمرشل عمارتوں کے خلاف بڑا آپریشن، 170 املاک سیل
▫️ کارروائیاں گلبرگ، فیصل ٹاؤن، گلشن راوی، جی ٹی روڈ، پی سی ایس آئی آر ، کالج روڈ، علامہ اقبال ٹاؤن اور سبزہ زار میں کی گئیں، کمرشل فیسوں کی عدم ادائیگی اور غیر قانونی کمرشل استعمال پر بھی متعدد املاک سیل کر دی گئیں
ڈی جی ایل ڈی اے طاہر فاروق کی ہدایت پر لاہور ڈویلپمنٹ اتھارٹی (ایل ڈی اے ) کے ٹاؤن پلاننگ ونگ نے غیر قانونی کمرشل عمارتوں اور کمرشل فیس نادہندہ املاک کے خلاف ایل ڈی اے کنٹرولڈ ایریا میں بڑے پیمانے پر آپریشن کرتے ہوئے 170 املاک سیل کر دیں۔
ایل ڈی اے کی ٹیموں نے گلبرگ، فیصل ٹاؤن، گلشن راوی، جی ٹی روڈ، پی سی ایس آئی آر سکیم کالج روڈ، علامہ اقبال ٹاؤن اور سبزہ زار سمیت مختلف علاقوں میں کارروائیاں کیں۔ آپریشن غیر قانونی کمرشل استعمال، کمرشل فیسوں کی عدم ادائیگی اور قواعد و ضوابط کی خلاف ورزی پر کیا گیا۔
ایل ڈی اے کے مطابق گلبرگ اور فیصل ٹاؤن میں غیر قانونی کمرشل استعمال اور کمرشل فیسوں کی عدم ادائیگی پر 25 املاک کو سیل کیا گیا۔ اسی طرح گلشن راوی اور جی ٹی روڈ پر کارروائی کے دوران 35 املاک سیل کی گئیں۔
پی سی ایس آئی آر سکیم کالج روڈ پر ایل ڈی اے ٹیموں نے کارروائی کرتے ہوئے 70 غیر قانونی کمرشل دکانوں کو سیل کر دیا۔ ریکوری آپریشن کے دوران علامہ اقبال ٹاؤن اور سبزہ زار میں بھی 40 املاک کو سیل کیا گیا۔
سیل کی گئی املاک میں نجی سکول، ریسٹورنٹس، فوڈ پوائنٹس، بیوٹی سیلون، کلینکس، گراسری سٹورز، بیکری، فارمیسی، آٹو ورکشاپس، دکانیں، دفاتر اور دیگر کمرشل یونٹس شامل ہیں۔
ایل ڈی اے حکام کے مطابق کارروائی چیف ٹاؤن پلانر ون اسد الزمان اور چیف ٹاؤن پلانر ٹو اظہر علی کی زیر نگرانی کی گئی۔ آپریشن میں ایل ڈی اے کے متعلقہ ٹاؤن پلاننگ عملے نے حصہ لیا۔
ڈی جی ایل ڈی اے طاہر فاروق کا کہنا ہے کہ غیر قانونی کمرشل عمارتوں اور کمرشل فیس نادہندہ املاک کے خلاف بلا امتیاز کارروائیاں جاری رہیں گی۔ انہوں نے کہا کہ شہر میں غیر قانونی کمرشل سرگرمیوں کی اجازت نہیں دی جائے گی اور قواعد کی خلاف ورزی کرنے والوں کے خلاف قانون کے مطابق سخت کارروائی عمل میں لائی جائے گی۔