تاریخ اشاعت: June 3, 2026 - 11:33 AM
LDA Seals 128 Properties in Major Crackdown on Illegal Commercial Buildings and Defaulters
ایل ڈی اے کا غیر قانونی کمرشل عمارتوں اور نادہندگان کے خلاف بڑا آپریشن، 128 املاک سیل کردی گئیں
▫️کارروائیاں شہر کے مختلف علاقوں میں کی گئیں, سیل کی گئی املاک میں نجی سکول، ریسٹورینٹس، فوڈ پوائنٹس، بیوٹی سیلون، کلینک، دکانیں، دفاتر اور دیگر کاروباری مراکز شامل ہیں
لاہور ڈویلپمنٹ اتھارٹی نے غیر قانونی کمرشل استعمال، کمرشل فیسوں کی عدم ادائیگی اور بلڈنگ قوانین کی خلاف ورزیوں کے خلاف بڑے پیمانے پر کارروائیاں کرتے ہوئے مختلف علاقوں میں 128 املاک سیل کر دیں۔
ڈی جی ایل ڈی اے طاہر فاروق کی ہدایت پر ایل ڈی اے ٹاؤن پلاننگ ونگ نے ایل ڈی اے کنٹرولڈ ایریا میں غیر قانونی کمرشل عمارتوں اور فیس نادہندگان کے خلاف آپریشن کیا۔ کارروائیاں گلبرگ، نیو گارڈن ٹاؤن، جوہر ٹاؤن، گلشن راوی، جی ٹی روڈ اور سبزہ زار سمیت مختلف علاقوں میں کی گئیں۔
ایل ڈی اے حکام کے مطابق غیر قانونی کمرشل استعمال کے خلاف کارروائی کے دوران گلشن راوی اور جی ٹی روڈ پر 39 املاک سربمہر کی گئیں۔ اسی طرح گلبرگ اور نیو گارڈن ٹاؤن سکیم میں غیر قانونی کمرشل استعمال اور کمرشل فیسوں کی عدم ادائیگی پر 24 املاک سیل کی گئیں۔
جوہر ٹاؤن میں ایل ڈی اے ٹیموں نے کارروائی کرتے ہوئے 35 غیر قانونی کمرشل دکانیں سربمہر کر دیں، جبکہ ریکوری آپریشن کے دوران سبزہ زار میں 30 املاک سیل کی گئیں۔ حکام کے مطابق یہ کارروائیاں بلڈنگ قوانین پر عملدرآمد یقینی بنانے، سرکاری واجبات کی وصولی اور رہائشی علاقوں میں غیر قانونی کمرشل سرگرمیوں کے تدارک کے لیے کی جا رہی ہیں۔
سیل کی گئی املاک میں نجی سکول، ریستوران، فوڈ پوائنٹس، بیوٹی سیلون، کلینک، گراسری سٹورز، بیکری، فارمیسی، آٹو ورکشاپس، دکانیں، دفاتر اور دیگر کاروباری مراکز شامل ہیں۔ ایل ڈی اے کے مطابق متعدد املاک کو پہلے بھی نوٹسز جاری کیے گئے تھے، تاہم قوانین کی خلاف ورزی اور واجبات کی عدم ادائیگی پر عملی کارروائی کی گئی۔
آپریشن چیف ٹاؤن پلانر ون اسد الزمان اور چیف ٹاؤن پلانر ٹو اظہر علی کی زیر نگرانی کیا گیا، جبکہ متعلقہ ڈائریکٹوریٹس اور فیلڈ ٹیموں نے مختلف علاقوں میں بیک وقت کارروائیاں کیں۔
ڈی جی ایل ڈی اے طاہر فاروق کا کہنا ہے کہ غیر قانونی کمرشل عمارتوں، کمرشل فیس نادہندگان اور بلڈنگ قوانین کی خلاف ورزی کرنے والوں کے خلاف بلا امتیاز کارروائیاں جاری رہیں گی۔ انہوں نے کہا کہ شہری ترقیاتی قوانین پر عملدرآمد یقینی بنانا ایل ڈی اے کی بنیادی ذمہ داری ہے اور اس سلسلے میں کسی قسم کی رعایت نہیں دی جائے گی۔