تاریخ اشاعت: June 4, 2026 - 9:35 AM
LDA Revenue Reaches Highest Level in History, Collections Exceed Rs73.8 Billion in Two Years
ایل ڈی اے کی آمدن تاریخ کی بلند ترین سطح پر، دو سال میں 73.8 ارب روپے سے زائد وصولیاں
▫️مالی سال 26-2025 کے پہلے 11 ماہ میں 25 ارب روپے ریونیو جمع، سال کے اختتام تک وصولیاں 29 ارب روپے تک پہنچنے کا امکان
لاہور ڈویلپمنٹ اتھارٹی کی آمدن تاریخ کی بلند ترین سطح پر پہنچ گئی ہے، جبکہ گزشتہ دو برس کے دوران ایل ڈی اے نے مجموعی طور پر 73.8 ارب روپے سے زائد وصولیاں کر کے نیا ریکارڈ قائم کر دیا ہے۔ سرکاری اعداد و شمار کے مطابق مالی سال 26-2025 کے پہلے 11 ماہ میں ایل ڈی اے نے 25 ارب روپے کا ریونیو جمع کیا، جبکہ مالی سال کے اختتام تک مجموعی وصولیاں تقریباً 29 ارب روپے تک پہنچنے کا امکان ہے۔
حکام کے مطابق یہ کارکردگی ادارے کی تاریخ کی سب سے نمایاں مالی کارکردگی قرار دی جا رہی ہے۔ گزشتہ ایک دہائی کے دوران ایل ڈی اے کی آمدن میں 232 فیصد اضافہ ریکارڈ کیا گیا۔ مالی سال 17-2016 میں ادارے کی آمدن 8.7 ارب روپے تھی، جو مالی سال 26-2025 میں بڑھ کر متوقع طور پر 29 ارب روپے تک پہنچ رہی ہے۔
اعداد و شمار کے مطابق گزشتہ دو برس کے دوران ایل ڈی اے کی آمدن میں نمایاں بہتری آئی۔ حکام کا کہنا ہے کہ وزیر اعلیٰ پنجاب مریم نواز شریف کی ڈیجیٹل گورننس پالیسی، ریگولیٹری اصلاحات، ادارہ جاتی تنظیم نو، آن لائن سروسز اور شفاف نظام کے باعث وصولیوں میں تاریخی اضافہ ممکن ہوا۔ اس دوران غیر قانونی کمرشلائزیشن کے خلاف کارروائیاں تیز کی گئیں، جائیدادوں کی ڈیجیٹل میپنگ کا دائرہ بڑھایا گیا اور انفورسمنٹ آپریشنز کو مزید مؤثر بنایا گیا۔
سرکاری اعداد و شمار میں تحریک انصاف کے چار سالہ دور اور موجودہ حکومتی مدت کا تقابلی جائزہ بھی پیش کیا گیا ہے۔ رپورٹ کے مطابق پی ٹی آئی کے چار سالہ دور میں ایل ڈی اے کی مجموعی آمدن 46.9 ارب روپے رہی، جبکہ گزشتہ دو برس کے دوران وصولیوں کا حجم 73.8 ارب روپے سے تجاوز کر گیا۔ حکام کے مطابق یہ فرق ادارہ جاتی اصلاحات، سخت نگرانی، قانون کے مؤثر نفاذ اور ریونیو نظام میں بہتری کا نتیجہ ہے۔
ایل ڈی اے نے آمدن کے مختلف ذرائع سے ریکارڈ وصولیاں کیں۔ ان ذرائع میں کمرشلائزیشن فیس، غیر قانونی کمرشلائزیشن چارجز، پلاٹ ٹرانسفر فیس، ایل ڈی اے سٹی ٹرانسفرز، استثنیٰ فیس، عمارتوں کی مدت تعمیر میں توسیع کے چارجز، ٹاؤن پلاننگ فیس و جرمانے، لیز آمدن، اربن اموویبل پراپرٹی ٹیکس میں حصہ، پلاٹوں کی فروخت اور ترقیاتی چارجز شامل ہیں۔
حکام کے مطابق غیر قانونی کمرشل سرگرمیوں کے خلاف انفورسمنٹ مہم کے دوران جرمانوں کی مد میں 2 ارب روپے سے زائد وصول کیے گئے۔ اس دوران ہزاروں نوٹسز جاری کیے گئے اور لاہور کے مختلف علاقوں میں قانون کی خلاف ورزی کرنے والی املاک کے خلاف کارروائیاں کی گئیں۔ حکام کا کہنا ہے کہ ان اقدامات کے باعث نہ صرف ریونیو میں اضافہ ہوا بلکہ شہری حدود میں قوانین پر عمل درآمد کی شرح بھی بہتر ہوئی۔
ایل ڈی اے نے سرمایہ کاروں اور پراپرٹی مالکان کے لیے کاروبار دوست اقدامات بھی متعارف کرائے۔ نیلامی کے طریقہ کار کو آسان بنایا گیا، بعض اراضی استعمال ضوابط میں نرمی کی گئی اور سروس ڈیلیوری کو بہتر بنانے کے لیے ڈیجیٹل پلیٹ فارمز کو فعال کیا گیا۔ ادارے کے مطابق ان اصلاحات سے شہریوں، بلڈرز، ڈویلپرز اور سرمایہ کاروں کو سہولت ملی، جبکہ فائلوں کے روایتی نظام پر انحصار کم ہوا۔
ادارہ جاتی بہتری کے اثرات ایل ڈی اے کے سٹیزن فیسیلیٹیشن سینٹر کی کارکردگی میں بھی نمایاں نظر آئے۔ اعداد و شمار کے مطابق 2025 کے دوران مرکز نے 63 ہزار سے زائد درخواستوں پر کارروائی کی۔ اس دوران ہزاروں این او سیز جاری کیے گئے، عمارتوں کے نقشے منظور کیے گئے اور ٹرانسفر و کمرشلائزیشن سے متعلق بڑی تعداد میں کیسز نمٹائے گئے۔ حکام کے مطابق یہ اعداد و شمار شہریوں کے بڑھتے ہوئے اعتماد اور ڈیجیٹل نظام کے استعمال میں اضافے کی عکاسی کرتے ہیں۔
شہری ترقی کے ماہرین کا کہنا ہے کہ مہنگائی، جائیدادوں کی بڑھتی ہوئی قیمتوں اور مارکیٹ سرگرمیوں نے بھی ایل ڈی اے کی آمدن میں اضافے میں کردار ادا کیا، تاہم غیر معمولی بہتری کی بنیادی وجہ انتظامی اصلاحات، مؤثر مانیٹرنگ، ڈیجیٹل گورننس اور ریونیو ذرائع کی بہتر نگرانی ہے۔
ماہرین کے مطابق لاہور کی تیزی سے بڑھتی شہری آبادی، رہائشی و کمرشل سرگرمیوں میں اضافہ اور انفراسٹرکچر کی نئی ضروریات کے پیش نظر ایل ڈی اے کا کردار آئندہ برسوں میں مزید اہم ہو جائے گا۔ حکومت کے نزدیک ایل ڈی اے کی حالیہ مالی کارکردگی اس بات کی مثال ہے کہ ڈیجیٹل اصلاحات، شفافیت اور قانون کے مؤثر نفاذ کے ذریعے سرکاری اداروں کی آمدن اور کارکردگی میں نمایاں بہتری لائی جا سکتی ہے۔