تاریخ اشاعت: June 8, 2026 - 10:43 AM
Auction of Two Prime Plots Reserved for Petrol Pumps in IT City Completed
آئی ٹی سٹی میں پٹرول پمپ کے لیے مختص دو قیمتی پلاٹس کی نیلامی مکمل
▫️5.38 کنال اور 6.77 کنال رقبے کے پلاٹس کے لیے سالانہ بنیادی قیمت بالترتیب ڈھائی کروڑ اور تین کروڑ روپے مقرر کی گئی تھی
پنجاب سینٹرل بزنس ڈسٹرکٹ ڈویلپمنٹ اتھارٹی (سی بی ڈی پنجاب) نے پاکستان کے سب سے بڑے اور پہلے آئی ٹی سٹی، سی بی ڈی این ایس آئی ٹی سٹی، میں پٹرول پمپ کے لیے مختص دو انتہائی اہم اور قیمتی پلاٹس کی لیز نیلامی کا عمل مکمل کر لیا ہے۔
حکام کے مطابق نیلامی لفافہ بند بولیوں کے ذریعے کی گئی، جس کا مقصد آئی ٹی سٹی میں بنیادی سہولتوں کی فراہمی کے ساتھ ساتھ تجارتی سرگرمیوں کو منظم اور شفاف انداز میں فروغ دینا ہے۔ سی بی ڈی پنجاب نے پٹرول پمپ کی تعمیر کے لیے اہم مقامات پر واقع دو پلاٹس لیز کی بنیاد پر پیش کیے تھے۔
نیلامی میں شامل پہلا پلاٹ نمبر F-12-02 ہے، جس کا رقبہ 5.38 کنال ہے۔ اس پلاٹ کی سالانہ بنیادی قیمت ڈھائی کروڑ روپے مقرر کی گئی تھی۔ دوسرا پلاٹ نمبر F-02-02 ہے، جس کا رقبہ 6.77 کنال ہے، جبکہ اس کی سالانہ بنیادی قیمت تین کروڑ روپے رکھی گئی تھی۔
سی بی ڈی پنجاب کے مطابق دونوں پلاٹس آئی ٹی سٹی کے اہم مقامات پر واقع ہیں، جہاں مستقبل میں ٹریفک، کاروباری سرگرمیوں اور شہری سہولتوں کی ضروریات میں اضافہ متوقع ہے۔ پٹرول پمپ کے قیام سے نہ صرف آئی ٹی سٹی میں آنے والے شہریوں، سرمایہ کاروں، دفاتر اور کاروباری اداروں کو سہولت ملے گی بلکہ منصوبے کی کمرشل ویلیو میں بھی اضافہ ہوگا۔
اتھارٹی کا کہنا ہے کہ سی بی ڈی این ایس آئی ٹی سٹی کو جدید کاروباری، ٹیکنالوجی اور سرمایہ کاری مرکز کے طور پر ترقی دی جا رہی ہے۔ اس تناظر میں بنیادی انفراسٹرکچر، سروس ایریاز اور کمرشل سہولتوں کی فراہمی منصوبے کی تکمیل اور فعالیت کے لیے اہم قرار دی جا رہی ہے۔
حکام کے مطابق نیلامی کا عمل شفاف طریقہ کار کے تحت مکمل کیا گیا، جبکہ لیز کی بنیاد پر پلاٹس کی پیشکش سے اتھارٹی کو مستقل آمدن حاصل ہوگی۔ سی بی ڈی پنجاب کا کہنا ہے کہ آئی ٹی سٹی میں سرمایہ کاری کے مواقع کو مزید وسعت دینے کے لیے مستقبل میں بھی مختلف کمرشل اور سروس سیکٹر منصوبوں پر کام جاری رہے ۔