تاریخ اشاعت: June 13, 2026 - 6:02 PM
LDA DG Visits Data Darbar Expansion Project and Bhatti Chowk Underpass, Directs Acceleration of Work
ڈی جی ایل ڈی اے کا داتا دربار توسیعی منصوبے اور بھاٹی چوک انڈر پاس کا دورہ، کام تیز کرنے کی ہدایت
▫️بھاٹی چوک انڈر پاس کی کھدائی مکمل، نیسپاک کو تعمیراتی معیار سو فیصد یقینی بنانے کی ہدایت
ڈائریکٹر جنرل لاہور ڈویلپمنٹ اتھارٹی طاہر فاروق نے داتا دربار توسیعی منصوبے اور زیر تعمیر بھاٹی چوک انڈر پاس کا دورہ کیا، جہاں انہوں نے ترقیاتی کاموں کی رفتار اور معیار کا تفصیلی جائزہ لیا۔
دورے کے دوران چیف انجینئر ٹیپا اقرار حسین اور پراجیکٹ ڈائریکٹر نے ڈی جی ایل ڈی اے کو دونوں منصوبوں پر جاری کاموں کے بارے میں تفصیلی بریفنگ دی۔ بریفنگ میں بتایا گیا کہ داتا دربار کے پیازہ اور انڈر گراؤنڈ پیڈسٹرین انڈر پاس پر فنشنگ ورک جاری ہے، جبکہ پارکنگ ایریا اور ٹوائلٹ بلاک پر بھی بیک وقت کام کیا جا رہا ہے۔
ڈی جی ایل ڈی اے طاہر فاروق نے داتا دربار توسیعی منصوبے کے مختلف حصوں کا معائنہ کیا اور فنشنگ ورک کے معیار کو مزید بہتر بنانے کی ہدایت کی۔ انہوں نے متعلقہ افسران کو تاکید کی کہ منصوبے کے تمام تعمیراتی اور تزئین و آرائش کے کام اعلیٰ معیار کے مطابق مکمل کیے جائیں تاکہ زائرین کو بہتر سہولیات فراہم کی جا سکیں۔
چیف انجینئر ٹیپا نے بریفنگ دیتے ہوئے بتایا کہ داتا دربار کے اطراف واقع املاک کی اپ گریڈیشن کے لیے اضافی ٹیمیں کام کر رہی ہیں۔ منصوبے کے تحت زائرین کی سہولت، پیدل آمد و رفت، پارکنگ اور دیگر بنیادی سہولیات کو بہتر بنانے کے لیے مختلف کام تیزی سے جاری ہیں۔
ڈی جی ایل ڈی اے نے زیر تعمیر بھاٹی چوک انڈر پاس کا بھی دورہ کیا اور وہاں جاری تعمیراتی سرگرمیوں کا جائزہ لیا۔ بریفنگ میں بتایا گیا کہ بھاٹی چوک انڈر پاس کی کھدائی مکمل کر لی گئی ہے جبکہ بیڈ پر کام جاری ہے۔ منصوبے کے این جے بیرئیر اور دیواروں پر بھی بیک وقت کام کیا جا رہا ہے۔
طاہر فاروق نے متعلقہ حکام کو بھاٹی چوک انڈر پاس کے تعمیراتی کام مزید تیز کرنے کی ہدایت کی۔ انہوں نے کہا کہ منصوبے کی بروقت تکمیل کے ساتھ ساتھ تعمیراتی معیار پر کسی قسم کا سمجھوتہ نہیں ہونا چاہیے۔
ڈی جی ایل ڈی اے نے نیسپاک حکام کو بھی ہدایت کی کہ منصوبے کے ہر مرحلے میں معیار کو سو فیصد یقینی بنایا جائے۔ انہوں نے کہا کہ داتا دربار توسیعی منصوبہ اور بھاٹی چوک انڈر پاس شہر کے اہم ترقیاتی منصوبے ہیں، جن کی تکمیل سے ٹریفک روانی، زائرین کی سہولت اور شہری انفراسٹرکچر میں نمایاں بہتری آئے گی۔