تاریخ اشاعت: April 30, 2026 - 11:55 AM
Sindh Government Decides to Provide Affordable Electricity to Low Income Groups and Industries
سندھ حکومت کا کم آمدن طبقے اور صنعتوں کیلئے سستی بجلی فراہم کرنے کا فیصلہ
▫️صنعتی شعبے کو ریلیف دینے اور پسماندہ علاقوں میں بجلی کی فراہمی بہتر بنانے کیلئے عملی تجاویز طلب
کراچی میں بڑھتی ہوئی گرمی اور جاری بجلی بحران کے پیش نظر حکومت سندھ نے شہریوں کو ریلیف فراہم کرنے کیلئے اہم اقدامات کا آغاز کر دیا ہے۔ خصوصاً کم آمدن طبقے اور صنعتی شعبے کو سہولت دینے کیلئے ایک جامع حکمت عملی ترتیب دی جا رہی ہے۔
وزیراعلیٰ سندھ سید مراد علی شاہ نے شہر کے پسماندہ علاقوں اور صنعتی زونز کو سستی بجلی فراہم کرنے کا اصولی فیصلہ کیا ہے۔ اس حوالے سے وزیراعلیٰ ہاؤس میں چیئرمین کے الیکٹرک شہریار چشتی سے ملاقات کے دوران اہم ہدایات جاری کی گئیں۔ اجلاس میں کے الیکٹرک کے سی ای او سید طحہٰ، پرنسپل سیکریٹری آغا واصف اور سیکریٹری توانائی شعیب انصاری سمیت دیگر اعلیٰ حکام نے شرکت کی۔
وزیراعلیٰ نے محکمہ توانائی اور کے الیکٹرک کو ہدایت کی کہ بجلی صارفین کیلئے سبسڈی پروگرام پر مشترکہ طور پر تفصیلی جائزہ لیا جائے، تاکہ کم آمدن والے طبقے کو مؤثر ریلیف فراہم کیا جا سکے۔ انہوں نے صنعتی شعبے کیلئے بھی سستی بجلی کی فراہمی کے حوالے سے قابل عمل اور دیرپا تجاویز پیش کرنے کی ہدایت کی۔
مراد علی شاہ نے اس امر پر زور دیا کہ گرمیوں کے آغاز کے ساتھ ہی پسماندہ علاقوں کے مکین شدید مشکلات کا شکار ہو جاتے ہیں، لہٰذا فوری اور مؤثر اقدامات ناگزیر ہیں۔ انہوں نے متعلقہ اداروں کو ہدایت دی کہ ایک شفاف اور قابل عمل نظام وضع کیا جائے جس کے ذریعے مستحق گھرانوں تک ہدفی سبسڈی کے ثمرات براہ راست پہنچ سکیں۔