تاریخ اشاعت: May 20, 2026 - 10:00 AM
Punjab Pavilion inaugurated at Baku World Urban Forum, ‘Apni Chhat, Apna Ghar’ programme receives global recognition
باکو ورلڈ اربن فورم میں پنجاب پویلین کا افتتاح، ’اپنی چھت، اپنا گھر‘ پروگرام کو عالمی پذیرائی مل گئی
▫️وزیراعلیٰ مریم نواز شریف نے پنجاب پویلین کا دورہ کیا، ورچوئل وزٹ، ڈاکومنٹری اور ڈیش بورڈ کے ذریعے ہاؤسنگ پروگرام کی پیش رفت کا جائزہ لیا
وزیراعلیٰ پنجاب مریم نواز شریف نے آذربائیجان کے دارالحکومت باکو میں منعقدہ ورلڈ اربن فورم کے دوران پنجاب پویلین کا افتتاح کر دیا، جہاں پنجاب حکومت کے افورڈ ایبل اربن ہاؤسنگ منصوبے ’اپنی چھت، اپنا گھر‘ کو عالمی سطح پر بھرپور پذیرائی ملی۔
وزیراعلیٰ مریم نواز شریف نے اربن ایکسپو میں قائم پنجاب پویلین کا تفصیلی دورہ کیا اور مختلف سٹالز کا معائنہ کیا۔ اس موقع پر ڈی جی پھاٹا ذیشان سکندر نے وزیراعلیٰ کو ’اپنی چھت، اپنا گھر‘ پروگرام سے متعلق بریفنگ دی اور منصوبے کی پیش رفت، ڈیش بورڈ، تعمیراتی مراحل اور مستفید ہونے والے شہریوں کے حوالے سے تفصیلات سے آگاہ کیا۔
وزیراعلیٰ مریم نواز شریف نے ورلڈ اینوویشن میں ’اپنی چھت، اپنا گھر‘ پروگرام کو نمایاں مقام حاصل کرتے دیکھ کر مسرت کا اظہار کیا۔ انہوں نے آئی گیجٹس کی مدد سے پروگرام کا لائیو ورچوئل وزٹ کیا، تعمیراتی ڈاکومنٹری سٹوری دیکھی اور منصوبے کے ڈیش بورڈ کا بھی مشاہدہ کیا۔
پنجاب پویلین میں موجود غیر ملکی شرکاء، عالمی وفود اور میڈیا نمائندوں کو وزیراعلیٰ مریم نواز شریف نے پنجاب کے افورڈ ایبل اربن ہاؤسنگ منصوبے کی کامیابی سے متعلق آگاہ کیا۔ انہوں نے بتایا کہ ’اپنی چھت، اپنا گھر‘ پروگرام ان کے دل کے بہت قریب ہے، کیونکہ اس کے ذریعے پنجاب کے عوام کو بلاتفریق اور بلاامتیاز گھر بنانے کے لیے قرض فراہم کیا جا رہا ہے۔
وزیراعلیٰ کے مطابق اس منصوبے کے تحت روزانہ 600 سے 700 گھر تعمیر ہو رہے ہیں، جبکہ محض ایک سال کے قلیل عرصے میں ایک لاکھ سے زائد گھر مکمل کیے جا چکے ہیں۔ انہوں نے کہا کہ یہ پروگرام کم آمدن اور متوسط طبقے کے شہریوں کو باعزت رہائش فراہم کرنے کی جانب ایک عملی قدم ہے۔
پنجاب پویلین میں ’اپنی چھت، اپنا گھر‘ پروگرام سے متعلق دستاویزی فلم بھی دکھائی گئی، جس میں منصوبے سے فائدہ اٹھانے والے شہریوں کی خوشی اور اطمینان کو اجاگر کیا گیا۔ غیر ملکی مہمانوں اور بین الاقوامی میڈیا نے اس ڈاکومنٹری کو سراہا اور وزیراعلیٰ مریم نواز شریف کے عوامی اقدامات پر انہیں خراج تحسین پیش کیا۔
افتتاحی تقریب میں بین الاقوامی میڈیا، عالمی وفود اور مختلف ممالک کے نمائندوں نے بھرپور شرکت کی۔ شرکاء نے وزیراعلیٰ مریم نواز شریف کے وژن، پنجاب حکومت کے ہاؤسنگ اقدامات اور منصوبے کی تیز رفتار پیش رفت کو قابل تحسین قرار دیا۔
ورلڈ اربن فورم میں پنجاب پویلین دنیا بھر کے مندوبین کی توجہ کا مرکز بنا رہا، جبکہ بین الاقوامی میڈیا نے ’اپنی چھت، اپنا گھر‘ پروگرام کی ریکارڈ رفتار کو ترقی پذیر ممالک کے لیے ایک رول ماڈل قرار دیا۔