تاریخ اشاعت: May 25, 2026 - 9:50 AM
Punjab Approves Comprehensive Eid Cleanliness Plan, Rs 50,000 Fine for Dumping Animal Waste in Streets and Neighborhoods on Eidul Azha
پنجاب میں عید صفائی آپریشن کا جامع پلان منظور، عید الاضحی پر آلائشیں گلی محلوں میں پھینکنے پر 50 ہزار روپے جرمانہ ہوگا
▫️مریم نواز کا ہاؤسنگ سوسائٹیوں، ریلوے کالونیز، کنٹونمنٹ ایریاز، مرکزی شاہراہوں، چوراہوں، قبرستانوں، کمرشل مارکیٹوں، ڈرینز، کینالز میں صفائی کے خصوصی انتظامات یقینی بنانے کی ہدایت
وزیراعلیٰ پنجاب مریم نواز شریف نے عید الاضحی کے موقع پر گلی محلوں، ممنوعہ مقامات، ڈرینز، کینالز اور دیگر عوامی مقامات پر جانوروں کی باقیات اور آلائشیں پھینکنے والوں کے خلاف سخت کارروائی کی منظوری دے دی ہے۔ خلاف ورزی کرنے والوں کو 50 ہزار روپے جرمانہ کیا جائے گا۔
وزیراعلیٰ پنجاب کی زیر صدارت ویڈیو لنک اجلاس میں عید الاضحی پر صفائی کے فول پروف انتظامات کا پلان تیار کیا گیا۔ اجلاس میں ممنوعہ مقامات پر آلائشیں اور باقیات پھینکنے کی روک تھام اور نگرانی کے لیے ویجلینس سکواڈ قائم کرنے کا فیصلہ کیا گیا۔
وزیراعلیٰ نے ہدایت کی کہ عوام کو ممنوعہ مقامات پر جانوروں کی باقیات اور آلائشیں پھینکنے سے روکنے کے لیے بھرپور ابلاغ عامہ مہم چلائی جائے۔ انہوں نے ہر شہر میں ڈرینز، کینالز، مرکزی شاہراہوں، چوراہوں، قبرستانوں، کمرشل مارکیٹوں، ریلوے کالونیز، کنٹونمنٹ ایریاز اور پرائیویٹ ہاؤسنگ سوسائٹیوں میں صفائی کے خصوصی انتظامات یقینی بنانے کی ہدایت کی۔
اجلاس میں پنجاب بھر کی 2687 نمایاں کمرشل مارکیٹوں کی صفائی کا خصوصی اہتمام کرنے کا حکم بھی دیا گیا۔ مریم نواز شریف نے کہا کہ عید الاضحی پر صفائی کے لیے ون گورنمنٹ یونٹ بن کر کام کرنا ہوگا۔ انہوں نے واضح کیا کہ اچھی کارکردگی پر انعام اور ستائش ہوگی جبکہ شکایات پر سزا اور جزا کا عمل بھی نافذ کیا جائے گا۔
صوبائی وزیر بلدیات ذیشان رفیق اور سیکرٹری بلدیات میاں شکیل احمد نے اجلاس کو بریفنگ دیتے ہوئے بتایا کہ چاند رات کے آخری پہر کمرشل مارکیٹوں، مرکزی شاہراہوں اور چوراہوں کی صفائی کی جائے گی۔ عید الاضحی پر جانوروں کی باقیات اور آلائشیں ڈالنے کے لیے ڈی گریڈ ایبل شاپنگ بیگ فراہم کیے جائیں گے جبکہ ستھرا پنجاب کا عملہ ڈور ٹو ڈور کولیکشن کرے گا۔
بریفنگ میں بتایا گیا کہ میونسپل کارپوریشنز اور تحصیلوں میں 15،15 جبکہ ہر یونین کونسل میں 4 اضافی لوڈر رکشے فراہم کیے جائیں گے۔ وزیراعلیٰ مریم نواز شریف کی ہدایت پر نماز عید کے اجتماعات اور مساجد میں عرق گلاب کا سپرے بھی کیا جائے گا۔
ستھرا پنجاب کی ٹیمیں عید سے پہلے، یوم عید اور عید کے تیسرے روز تک متحرک رہیں گی۔ ٹیمیں عوامی آگاہی کے لیے رکشوں پر منادی بھی کریں گی۔ صوبہ بھر میں عید صفائی آپریشن کے دوران 176000 سینٹری ورکرز اور 8 ہزار سے زائد عارضی کارکن حصہ لیں گے۔
جانوروں کی باقیات اور آلائشوں کے لیے 3800 پرائمری کولیکشن سنٹرز قائم کیے جائیں گے جبکہ 3100 ڈمپنگ سائٹس مقرر کی گئی ہیں۔ صوبہ بھر میں باقیات اور آلائشوں کو تلف کرنے کے لیے مجموعی طور پر 7 ہزار ڈمپنگ پوائنٹس بنائے جائیں گے۔
ڈرینز کی صفائی کے لیے ڈی واٹرنگ مشینوں، جیٹر سیٹ اور سکشن یونٹس کی دستیابی یقینی بنائی جائے گی۔ ستھرا پنجاب عید آپریشن کے لیے صوبہ بھر میں 4500 خصوصی کیمپ قائم کیے جائیں گے جبکہ اجتماعی قربانی کے لیے 1200 قربان گاہوں پر صفائی کے خصوصی انتظامات کیے جائیں گے۔
عید الاضحی ستھرا پنجاب آپریشن کے دوران صوبہ بھر میں 40 ہزار سے زائد اضافی گاڑیاں استعمال ہوں گی۔ صفائی آپریشن کے لیے لوڈر رکشے، منی ڈمپرز، ٹریکٹر ٹرالیاں اور پک اپ گاڑیاں ہائر کی جائیں گی۔
اجلاس میں بتایا گیا کہ چاند رات سے قبل قبرستانوں کی خصوصی صفائی بھی کی جائے گی۔ پنجاب بھر کی 285 کیٹل مارکیٹوں اور 171 سیل پوائنٹس پر ستھرا پنجاب کی ٹیمیں صفائی کے لیے تعینات ہوں گی۔