تاریخ اشاعت: May 29, 2026 - 2:30 PM
Islamabad High Court Stops Eviction of One Constitution Avenue Apartment Owners
اسلام آباد ہائیکورٹ نے ون کانسٹی ٹیوشن ایونیو کے اپارٹمنٹ مالکان کو بے دخلی سے روک دیا
▫️فیصلہ سابق ایئر چیف مجاہد انور خان، احسان مانی اور وسیم سجاد سمیت سب لیز ہولڈر اپارٹمنٹ مالکان کی انٹرا کورٹ اپیلوں پر ہوا
ون کانسٹی ٹیوشن ایونیو کیس میں اہم پیش رفت سامنے آئی ہے۔ اسلام آباد ہائی کورٹ نے اپارٹمنٹ مالکان کو بے دخل کرنے سے روک دیا ہے اور ہدایت کی ہے کہ اپارٹمنٹ مالکان کو تا حکم ثانی ون کانسٹی ٹیوشن ایونیو سے بے دخل نہ کیا جائے۔
اسلام آباد ہائی کورٹ کے جسٹس محمد اعظم خان اور جسٹس انعام امین منہاس پر مشتمل ڈویژن بنچ نے ون کانسٹی ٹیوشن ایونیو کے سب لیز ہولڈر اپارٹمنٹ مالکان کی انٹرا کورٹ اپیلوں پر سماعت کی۔
اپیل کنندگان میں سابق ایئر چیف مجاہد انور خان، سابق صدر آئی سی سی احسان مانی، سابق چیئرمین سینیٹ وسیم سجاد اور دیگر اپارٹمنٹ مالکان شامل ہیں۔
اپیل کنندگان نے تھرڈ پارٹی رائٹس کے تحفظ کے لیے سنگل بنچ کے فیصلے کے پیراگراف 30 کو چیلنج کر رکھا ہے۔ اپیلوں میں مؤقف اختیار کیا گیا کہ اپارٹمنٹ مالکان کے حقوق کا تحفظ کیا جانا ضروری ہے کیونکہ وہ سب لیز ہولڈر کی حیثیت سے اس معاملے سے براہ راست متاثر ہو رہے ہیں۔
سماعت کے دوران عدالت نے فریقین کے دلائل سننے کے بعد اپارٹمنٹ مالکان کے حق میں عبوری ریلیف دیتے ہوئے انہیں ون کانسٹی ٹیوشن ایونیو سے بے دخل کرنے سے روک دیا۔ عدالت نے واضح کیا کہ تا حکم ثانی اپارٹمنٹ مالکان کے خلاف بے دخلی کی کارروائی نہ کی جائے۔
عدالتی حکم کے بعد ون کانسٹی ٹیوشن ایونیو کے اپارٹمنٹ مالکان کو فی الحال ریلیف مل گیا ہے، تاہم کیس کی مزید سماعت میں فریقین کے دلائل اور قانونی نکات کا جائزہ لیا جائے گا۔