تاریخ اشاعت: June 11, 2026 - 6:30 PM
Traders Seek Additional Commercial Land Along Rawalpindi Ring Road Corridor
راولپنڈی رنگ روڈ کوریڈور کے اطراف اضافی کمرشل اراضی مختص کرنے کا مطالبہ
▫️آر ڈی اے نے مجوزہ لینڈ یوز پلان کا جائزہ لیا، کاروباری برادری کا سرمایہ کاری کے فروغ کے لیے مزید کمرشل اور صنعتی زونز بنانے پر زور
راولپنڈی کی تاجر برادری اور کاروباری نمائندوں نے راولپنڈی ڈویلپمنٹ اتھارٹی (آ ر ڈی اے ) سے مطالبہ کیا ہے کہ راولپنڈی رنگ روڈ کوریڈور کے اطراف اضافی کمرشل اور صنعتی اراضی مختص کی جائے تاکہ خطے میں سرمایہ کاری، تجارت اور معاشی سرگرمیوں کو پائیدار بنیادوں پر فروغ دیا جا سکے۔
یہ مطالبہ راولپنڈی رنگ روڈ کے اطراف لینڈ یوز پلاننگ سے متعلق آر ڈی اے ہیڈکوارٹرز میں ہونے والے اجلاس کے دوران سامنے آیا۔ اجلاس کمشنر راولپنڈی اور ڈائریکٹر جنرل آر ڈی اے انجینئر عامر خٹک کی ہدایت پر منعقد کیا گیا۔
اجلاس کی صدارت آر ڈی اے کے ایڈیشنل ڈائریکٹر جنرل مسعود احمد بخاری نے کی، جبکہ اجلاس میں آر ڈی اے کے چیف پلانر، راولپنڈی چیمبر آف کامرس اینڈ انڈسٹری کے نمائندوں، ڈپٹی ڈائریکٹر لوکل گورنمنٹ اور سی ای او ہیلتھ راولپنڈی سمیت متعلقہ سینئر حکام نے شرکت کی۔
آر ڈی اے کے اعلامیے کے مطابق اجلاس کے شرکا کو 15 مئی 2026 کو ہونے والے سابقہ اجلاس میں کیے گئے فیصلوں پر تفصیلی بریفنگ دی گئی۔ فورم نے مختلف بلاکس میں لینڈ ایکوزیشن کے لیے نشاندہی کردہ ترجیحی علاقوں کا جائزہ لیا اور مجوزہ لینڈ یوز پلان پر عمل درآمد کے لیے متعلقہ محکموں کی ذمہ داریوں پر تبادلہ خیال کیا۔
راولپنڈی چیمبر آف کامرس اینڈ انڈسٹری کے نمائندوں نے مؤقف اختیار کیا کہ رنگ روڈ کوریڈور کے اطراف مناسب کمرشل اور صنعتی زوننگ کاروباری سرگرمیوں کے فروغ، سرمایہ کاری کے حصول اور روزگار کے نئے مواقع پیدا کرنے میں اہم کردار ادا کرے گی۔ نمائندوں نے مستقبل کی معاشی ضروریات کو مدنظر رکھتے ہوئے منصوبے میں مزید کمرشل اراضی شامل کرنے کا مطالبہ کیا۔
اجلاس کے دوران آر ڈی اے حکام نے بتایا کہ مجوزہ پلان میں پہلے ہی مناسب مقدار میں کمرشل اور صنعتی رقبہ شامل کیا جا چکا ہے۔ حکام کے مطابق یہ منصوبہ بندی خطے کی پائیدار ترقی، منظم شہری پھیلاؤ اور رنگ روڈ کوریڈور کے اطراف مربوط معاشی سرگرمیوں کو فروغ دینے کے لیے تیار کی گئی ہے۔
ڈپٹی ڈائریکٹر لوکل گورنمنٹ اور سی ای او ہیلتھ راولپنڈی نے منصوبہ بندی کے عمل کو سراہتے ہوئے آر ڈی اے کی کاوشوں کی تعریف کی۔ اجلاس کے شرکا نے مجوزہ لینڈ یوز حکمت عملی کے کامیاب نفاذ کے لیے مکمل تعاون کی یقین دہانی بھی کرائی۔
ڈپٹی ڈائریکٹر لوکل گورنمنٹ نے مزید کہا کہ مجوزہ پلان متعلقہ تحصیل کونسلز کو بھجوایا جائے گا تاکہ ان سے آرا اور سفارشات حاصل کی جا سکیں۔ حکام کے مطابق اس اقدام کا مقصد منصوبہ بندی کے عمل کو مزید مشاورتی، جامع اور شفاف بنانا ہے۔
اجلاس کے اختتام پر شرکا نے راولپنڈی رنگ روڈ کوریڈور کے اطراف مربوط منصوبہ بندی اور پائیدار ترقی کے لیے مشترکہ کوششیں جاری رکھنے کے عزم کا اعادہ کیا۔