تاریخ اشاعت: March 2, 2026 - 12:39 PM
Delay in Hyderabad–Sukkur Motorway termed harmful for regional economy
حیدرآباد۔سکھر موٹروے منصوبے میں تاخیر پر تشویش کا اظہار
▫️ منصوبے کی سست روی معیشت اور تجارتی سرگرمیوں کیلئے نقصان دہ قرار ▫️ حکومت سے فوری پیش رفت اور واضح ٹائم لائن دینے کا مطالبہ
کراچی | ری نیوز پاکستان پاسبان ڈیموکریٹک پارٹی (پی ڈی پی) کے چیئرمین الطاف شکور نے حیدرآباد۔سکھر موٹروے منصوبے میں طویل تاخیر پر گہری تشویش کا اظہار کرتے ہوئے کہا ہے کہ منصوبے کی عدم پیش رفت سندھ سمیت ملکی معیشت کیلئے نقصان دہ ثابت ہو...
پاسبان ڈیموکریٹک پارٹی (پی ڈی پی) کے چیئرمین الطاف شکور نے حیدرآباد۔سکھر موٹروے منصوبے میں طویل تاخیر پر گہری تشویش کا اظہار کرتے ہوئے کہا ہے کہ منصوبے کی عدم پیش رفت سندھ سمیت ملکی معیشت کیلئے نقصان دہ ثابت ہو رہی ہے۔
کراچی میں جاری بیان میں انہوں نے کہا کہ مذکورہ موٹروے قومی شاہراہ نیٹ ورک کا اہم حصہ ہے جو کراچی کی بندرگاہوں کو ملک کے بالائی علاقوں سے جوڑنے میں کلیدی کردار ادا کرے گا۔ ان کے مطابق منصوبے میں تاخیر کے باعث تجارتی نقل و حمل مہنگی ہو رہی ہے اور کاروباری سرگرمیوں کی رفتار متاثر ہو رہی ہے۔
الطاف شکور نے کہا کہ موٹروے کی بروقت تکمیل سے تجارتی رابطوں میں بہتری، صنعتی سرگرمیوں کے فروغ اور علاقائی ترقی کو تقویت مل سکتی ہے، تاہم مسلسل تاخیر سرمایہ کاری کے ماحول پر منفی اثر ڈال رہی ہے۔
انہوں نے وفاقی حکومت اور متعلقہ اداروں سے مطالبہ کیا کہ منصوبے کو ترجیحی بنیادوں پر مکمل کرنے کیلئے عملی اقدامات کیے جائیں اور اس کی پیش رفت سے متعلق واضح شیڈول جاری کیا جائے۔
انہوں نے مزید کہا کہ بڑے انفراسٹرکچر منصوبوں میں تاخیر نہ صرف اقتصادی منصوبہ بندی کو متاثر کرتی ہے بلکہ عوام اور کاروباری طبقے کے اعتماد کو بھی کمزور کرتی ہے۔