تاریخ اشاعت: March 5, 2026 - 10:47 AM
Punjab government advances environmental conservation and eco-tourism initiatives
پنجاب میں قدرتی مقامات اور ماحولیاتی تحفظ کے فروغ کیلئے نئے اقدامات
▫️ قدرتی وسائل کے تحفظ اور سیاحت کے فروغ سے علاقائی ترقی اور شہری سہولیات میں بہتری کی توقع ▫️ جدید ٹیکنالوجی کے استعمال سے قدرتی علاقوں کی نگرانی اور انتظام کو مضبوط بنانے کا فیصلہ
لاہور : ری نیوز پاکستان وزیراعلیٰ مریم نواز شریف نے کہا ہے کہ قدرتی ماحول اور جنگلی حیات کا تحفظ آئندہ نسلوں کے لیے نہایت اہم ہے اور اس مقصد کے لیے مؤثر پالیسی اقدامات ناگزیر ہیں، کیونکہ قدرتی وسائل کا تحفظ ماحولیاتی توازن اور پائیدار...
وزیراعلیٰ مریم نواز شریف نے کہا ہے کہ قدرتی ماحول اور جنگلی حیات کا تحفظ آئندہ نسلوں کے لیے نہایت اہم ہے اور اس مقصد کے لیے مؤثر پالیسی اقدامات ناگزیر ہیں، کیونکہ قدرتی وسائل کا تحفظ ماحولیاتی توازن اور پائیدار علاقائی ترقی کے لیے بنیادی حیثیت رکھتا ہے۔
ورلڈ وائلڈ لائف ڈے کے موقع پر اپنے خصوصی پیغام میں انہوں نے کہا کہ صوبائی حکومت قدرتی علاقوں کے تحفظ، بہتری اور جدید انتظامی نظام کے قیام کے لیے متعدد اقدامات کر رہی ہے تاکہ ماحولیاتی نظام کو مضبوط بنانے کے ساتھ ساتھ ان مقامات کو عوام کے لیے بہتر انداز میں قابلِ رسائی بنایا جا سکے۔
انہوں نے بتایا کہ غیر قانونی سرگرمیوں کی روک تھام اور قدرتی وسائل کے مؤثر انتظام کے لیے پنجاب وائلڈ لائف ایکٹ 1974 میں ترامیم کی گئی ہیں، جبکہ عوامی سہولت کے لیے وائلڈ لائف ہیلپ لائن 1107 کو صوبہ بھر میں فعال کر دیا گیا ہے۔
وزیراعلیٰ کے مطابق مختلف خدمات کو ڈیجیٹل نظام کے تحت لاتے ہوئے لائسنسنگ، اجازت ناموں اور رجسٹریشن کے عمل کو آن لائن کر دیا گیا ہے، جس سے انتظامی شفافیت اور مؤثر نگرانی میں بہتری آئے گی۔
انہوں نے بتایا کہ پہلی مرتبہ مصنوعی ذہانت پر مبنی جانوروں کی مردم شماری کا نظام متعارف کرایا گیا ہے، جبکہ جدید ٹریکنگ ٹیکنالوجی کے ذریعے قدرتی مقامات اور محفوظ علاقوں میں نگرانی کے نظام کو مزید مؤثر بنایا جا رہا ہے۔
حکومت کے مطابق ان اقدامات کے ساتھ ساتھ سیاحت اور عوامی آگاہی کے فروغ کے لیے بھی جدید سہولیات متعارف کرائی جا رہی ہیں۔ اس سلسلے میں سفاری زو لاہور میں نئی تفریحی اور تعلیمی سہولیات شامل کی جا رہی ہیں، جبکہ صوبے کا پہلا خصوصی وائلڈ لائف ہسپتال بھی تکمیل کے آخری مراحل میں ہے۔
مزید برآں شہریوں کو گھروں بیٹھے قدرتی ماحول سے آگاہی فراہم کرنے کے لیے 360 ڈگری ورچوئل زو کے قیام کا منصوبہ بھی زیر غور ہے۔ اس طرح کے اقدامات سے نہ صرف ماحولیاتی تحفظ کو فروغ ملے گا بلکہ قدرتی مقامات کی ترقی، سیاحتی سرگرمیوں میں اضافہ اور علاقائی ترقی کے نئے امکانات بھی پیدا ہوں گے۔