تاریخ اشاعت: May 8, 2026 - 4:20 PM
Deputy Prime Minister Ishaq Dar Visits Data Darbar, Reviews Ongoing Development Projects and Facilities for Pilgrims
نائب وزیراعظم اسحاق ڈار کی داتا دربار آمد، جاری ترقیاتی منصوبوں اور زائرین سہولیات کا تفصیلی جائزہ
▫️داتا دربار میگا پراجیکٹ بروقت مکمل کرنے کا عزم، انفراسٹرکچر، سکیورٹی اور رش مینجمنٹ بہتر بنانے کی ہدایت
نائب وزیراعظم اور وزیر خارجہ سینیٹر محمد اسحاق ڈار نے داتا دربار لاہور کا دورہ کیا جہاں انہوں نے حضرت داتا گنج بخشؒ کے مزار پر حاضری دی، فاتحہ خوانی کی اور ملکی سلامتی، قومی خوشحالی اور اُمتِ مسلمہ کے اتحاد و استحکام کیلئے خصوصی دعا کی۔
دورے کے دوران سیکرٹری اوقاف نے نائب وزیراعظم کو داتا دربار میں جاری ترقیاتی منصوبوں، انتظامی امور اور زائرین کو فراہم کی جانے والی سہولیات سے متعلق تفصیلی بریفنگ دی۔ انہیں دربار شریف کے توسیعی منصوبوں، سکیورٹی اقدامات، صفائی ستھرائی کے انتظامات، رش مینجمنٹ سسٹم اور عوامی سہولیات کی بہتری کے حوالے سے بھی آگاہ کیا گیا۔
اسحاق ڈار نے داتا دربار کے مختلف ترقیاتی منصوبوں کا معائنہ کرتے ہوئے جاری توسیعی پروگرام کو سراہا اور کہا کہ حضرت داتا گنج بخشؒ کا مزار روحانیت، امن، رواداری اور اسلامی اقدار کا عظیم مرکز ہے۔ انہوں نے کہا کہ حکومت زائرین کو بہتر سہولیات کی فراہمی کیلئے ہر ممکن اقدامات کر رہی ہے اور دربار شریف میں انفراسٹرکچر کی بہتری، جدید سکیورٹی نظام، صفائی اور مؤثر انتظامی حکمت عملی حکومت کے عوام دوست وژن کی عکاسی کرتی ہے۔
انہوں نے متعلقہ حکام کو ہدایت کی کہ جاری منصوبوں کو اعلیٰ معیار اور مقررہ مدت کے اندر مکمل کیا جائے تاکہ ملک بھر سے آنے والے زائرین کو مزید سہولت اور بہتر ماحول میسر آ سکے۔
اس موقع پر ڈاکٹر احسان بھٹہ نے کہا کہ داتا دربار میگا پراجیکٹ کو بروقت مکمل کرنے کیلئے تمام دستیاب وسائل بروئے کار لائے جا رہے ہیں اور منصوبے کی تکمیل سے زائرین کو جدید اور معیاری سہولیات فراہم ہوں گی۔
دورے کے دوران ایکسیئن سی اینڈ ڈبلیو محمد عیسیٰ، فہد نوید، جنرل منیجر نیسپاک عادل نذیر، ایکسیئن اوقاف قیصر منیر سمیت داتا دربار انتظامیہ کے دیگر اعلیٰ افسران بھی موجود تھے۔