تاریخ اشاعت: May 11, 2026 - 9:50 AM
Diversion Plan Issued for New Flyover Construction at Karachi’s Azeempura Interchange
کراچی کے عظیم پورہ انٹرچینج پر نئے فلائی اوور کی تعمیر کے لیے ٹریفک ڈائیورژن پلان جاری
▫️ریٹا پلاٹ چوک چاروں اطراف سے بند، کورنگی، شاہ فیصل اور ڈیفنس سے آنے والی ٹریفک کو متبادل راستوں پر موڑا جائے گا
کراچی ٹریفک پولیس نے عظیم پورہ انٹرچینج پر نئے فلائی اوور کی تعمیر شروع ہونے کے بعد شہریوں کے لیے جامع ٹریفک ڈائیورژن پلان جاری کر دیا ہے۔
ٹریفک پولیس حکام کے مطابق سنگر چورنگی اور کورنگی سے شاہراہِ فیصل جانے والی گاڑیوں کو شاہراہ بھٹو انٹرچینج سے ڈیفنس کی جانب موڑ دیا جائے گا۔ تعمیراتی کام کے دوران ریٹا پلاٹ چوک چاروں اطراف سے ٹریفک کے لیے مکمل طور پر بند رہے گا۔
ایئرپورٹ اور شاہراہِ فیصل سے آنے والی ٹریفک کو شاہ فیصل کے 2 نمبر چورنگی سے واپس موڑا جائے گا۔ اس راستے پر سفر کرنے والے شہری ای بی ایم کاز وے یا بلوچ کالونی کے ذریعے ڈیفنس کی جانب جا سکیں گے۔
حکام نے شاہراہِ فیصل استعمال کرنے والے شہریوں کو ہدایت کی ہے کہ وہ ڈیفنس اور کورنگی کی جانب سفر کے لیے ای بی ایم کاز وے اور شہیدِ ملت ایکسپریس وے استعمال کریں۔ ایئرپورٹ سے شاہراہِ فیصل کے ذریعے کورنگی جانے والی ٹریفک کو قائد آباد اور کورنگی کے راستے موڑا جائے گا، کیونکہ شہری شاہ فیصل کالونی کے راستے کورنگی نہیں جا سکیں گے۔
اسی طرح ڈیفنس اور کورنگی سے ایئرپورٹ جانے والی ٹریفک کو شاہراہ بھٹو سے نکلتے ہی ملیر کی جانب موڑ دیا جائے گا۔ وہاں سے شہری ملیر مندر روڈ کے ذریعے دوبارہ شاہراہِ فیصل پر آ کر ایئرپورٹ جا سکیں گے۔
ٹریفک پولیس نے واضح کیا ہے کہ شاہراہ بھٹو پر رکشوں، موٹر سائیکلوں اور لوڈر گاڑیوں کا داخلہ مکمل طور پر ممنوع ہے، تاہم دیگر تمام گاڑیوں کو یہ راستہ استعمال کرنے کی اجازت ہوگی۔
حکام نے شہریوں سے اپیل کی ہے کہ وہ سفر سے قبل اپنی منصوبہ بندی کریں، متبادل راستے استعمال کریں اور زحمت سے بچنے کے لیے موقع پر موجود ٹریفک عملے سے تعاون کریں۔ شہری متبادل راستوں سے متعلق رہنمائی کے لیے ٹریفک ہیلپ لائن 1915 پر بھی رابطہ کر سکتے ہیں۔