تاریخ اشاعت: May 4, 2026 - 11:15 AM
Lahore Development Programme Gains Momentum, Zero Tolerance Policy Enforced on Substandard Street Construction
لاہور ڈویلپمنٹ پروگرام تیزی سے جاری، گلیوں کی تعمیر میں معیار پر زیرو ٹالرنس پالیسی نافذ
▫️فیز ٹو میں 5,107 گلیاں مکمل، باقی علاقوں میں ترقیاتی کاموں کی رفتار تیز
ڈپٹی کمشنر لاہور کی زیر صدارت لاہور ڈویلپمنٹ پروگرام (LDP) کا ایک اہم جائزہ اجلاس منعقد ہوا جس میں ای او ایم سی ایل، ایڈیشنل ڈپٹی کمشنر فنانس، واسا، نیسپاک سمیت متعلقہ اداروں کے اعلیٰ افسران نے شرکت کی۔ اجلاس میں جاری ترقیاتی منصوبوں، خصوصاً گلیوں کی تعمیر کے معیار اور رفتار کا تفصیلی جائزہ لیا گیا۔
اجلاس کو بریفنگ دیتے ہوئے بتایا گیا کہ پروگرام کے فیز ٹو کے تحت اب تک 5 ہزار 107 گلیوں کی تعمیر مکمل کی جا چکی ہے، جبکہ دیگر علاقوں میں کام تیزی سے جاری ہے۔ حکام کا کہنا تھا کہ منصوبے کا دائرہ کار مزید وسعت اختیار کر رہا ہے تاکہ شہر کے تمام علاقوں کو یکساں ترقی دی جا سکے۔
ڈپٹی کمشنر لاہور نے واضح ہدایات جاری کرتے ہوئے کہا کہ ترقیاتی منصوبوں میں کسی بھی قسم کے غیر معیاری مٹیریل کا استعمال ہرگز برداشت نہیں کیا جائے گا اور اس ضمن میں زیرو ٹالرنس پالیسی اپنائی جائے۔ انہوں نے متعلقہ افسران کو ہدایت کی کہ گلیوں میں ٹف ٹائلز کی تنصیب مقررہ معیار کے مطابق یقینی بنائی جائے اور کام کی نگرانی کو مزید مؤثر بنایا جائے۔
انہوں نے مزید کہا کہ تمام منصوبوں میں عوامی سہولت اور حفاظت کو اولین ترجیح دی جائے اور اس سلسلے میں جاری کردہ ایس او پیز پر سختی سے عملدرآمد یقینی بنایا جائے تاکہ شہریوں کو محفوظ اور بہتر ماحول فراہم کیا جا سکے۔
ڈپٹی کمشنر نے اس عزم کا اعادہ کیا کہ لاہور ڈویلپمنٹ پروگرام کے تحت نظر انداز علاقوں میں بھی ترقیاتی کام بلا تعطل جاری رکھے جائیں گے، تاکہ شہر بھر میں متوازن اور یکساں ترقی کو یقینی بنایا جا سکے۔