تاریخ اشاعت: May 2, 2026 - 4:25 PM
Nila Gumbad Underground Parking Project 60% Completed Overall
نیلا گنبد انڈر گراؤنڈ پارکنگ منصوبہ مجموعی طور پر 60 فیصد مکمل کر لیا گیا
▫️تعمیراتی سائٹ پر حفاظتی انتظامات میں کسی بھی قسم کی غفلت یا کوتاہی برداشت نہیں کی جائے گی، سیکرٹری ہاؤسنگ
نیلا گنبد ری ماڈلنگ اور انڈر گراؤنڈ پارکنگ منصوبے پر تعمیراتی کام تیزی سے جاری ہے اور حکام کے مطابق اس کا گرے سٹرکچر مرحلہ 80 فیصد جبکہ مجموعی طور پر 60 فیصد کام مکمل ہو چکا ہے۔
سیکرٹری ہاؤسنگ پنجاب نورالامین مینگل نے نیلا گنبد منصوبے کے تعمیراتی سائٹ کا دورہ کیا اور جاری کام کا تفصیلی جائزہ لیا۔ اس موقع پر ڈی جی لاہور ڈویلپمنٹ اتھارٹی (ایل ڈی اے) طاہر فاروق اور چیف انجینئر ٹیپا اقرار حسین نے انہیں منصوبے کی پیش رفت پر بریفنگ دی۔
حکام کے مطابق منصوبے کے تحت پائلنگ کا مرحلہ مکمل کیا جا چکا ہے جبکہ زیر زمین ڈھانچے کی تعمیر آخری مراحل میں داخل ہو گئی ہے۔ منصوبے کو مقررہ معیار اور حفاظتی تقاضوں کے مطابق آگے بڑھایا جا رہا ہے۔
دورے کے دوران سیکرٹری ہاؤسنگ نے واضح ہدایت کی کہ تعمیراتی سائٹ پر حفاظتی انتظامات میں کسی بھی قسم کی غفلت یا کوتاہی برداشت نہیں کی جائے گی، جبکہ مزدوروں اور عملے کی حفاظت کے لیے تمام ضروری اقدامات یقینی بنانے پر زور دیا گیا۔
انہوں نے کہا کہ اس منصوبے کی تکمیل سے نیلا گنبد کے مصروف تجارتی علاقے میں پارکنگ کے دیرینہ مسئلے کا مؤثر حل سامنے آئے گا، جس سے نہ صرف ٹریفک کا دباؤ کم ہوگا بلکہ شہریوں کو بہتر سہولیات بھی میسر آئیں گی۔
حکام کے مطابق منصوبے کا مقصد تاریخی علاقے کے اصل تشخص کو برقرار رکھتے ہوئے جدید شہری سہولیات فراہم کرنا ہے، تاکہ شہر کے اس اہم تجارتی مرکز کو زیادہ منظم اور قابلِ رسائی بنایا جا سکے۔