تاریخ اشاعت: May 13, 2026 - 3:30 PM
Rawalpindi to Expand Signal Free Corridor with New Underpasses and Flyover Projects
راولپنڈی میں سگنل فری کوریڈور کی توسیع، نئے انڈر پاسز اور فلائی اوور منصوبے زیر غور
▫️پشاور روڈ پر قاسم مارکیٹ چوک، قبرستان چوک اور چیرنگ کراس چوک پر تین نئے انڈر پاسز تعمیر کیے جائیں گے
راولپنڈی میں ٹریفک کے بڑھتے دباؤ کو کم کرنے اور سگنل فری کوریڈور نیٹ ورک کو مزید وسعت دینے کے لیے متعدد نئے روڈ انفراسٹرکچر منصوبوں پر پیش رفت شروع کردی گئی ہے۔
حکام کے مطابق پشاور روڈ پر قاسم مارکیٹ چوک، قبرستان چوک اور چیرنگ کراس چوک کے مقامات پر تین نئے انڈر پاسز تعمیر کیے جائیں گے۔ ان منصوبوں کا مقصد شہر کے مصروف ترین مقامات پر ٹریفک جام میں کمی لانا اور شہریوں کو بلا رکاوٹ بہتر سفری سہولت فراہم کرنا ہے۔
حکام کا کہنا ہے کہ ان منصوبوں کی تکمیل کے بعد معرکۂ حق سکوائر سے موٹروے چوک تک مکمل سگنل فری کوریڈور دستیاب ہوگا، جس سے اسلام آباد انٹرنیشنل ایئرپورٹ، پشاور، لاہور اور ہزارہ موٹروے کی جانب سفر کرنے والی ٹریفک کی روانی میں نمایاں بہتری آئے گی۔
پشاور روڈ پر مجوزہ تین انڈر پاسز کے علاوہ دیگر منصوبے بھی زیر غور ہیں، جن میں اے ایف آئی سی چوک پر انڈر پاس، عمار شہید چوک پر فلائی اوور اور نائنتھ ایونیو کے مقام پر ڈبل روڈ کو اسلام آباد سے ملانے کے لیے ایک اور انڈر پاس شامل ہے۔
حکام کے مطابق یہ منصوبے راولپنڈی کے روڈ نیٹ ورک کو جدید خطوط پر استوار کرنے اور جڑواں شہروں میں بڑھتے ہوئے ٹریفک دباؤ کو منظم کرنے کی وسیع حکمت عملی کا حصہ ہیں۔ تیزی سے پھیلتی شہری آبادی اور روزانہ گاڑیوں کی بڑھتی تعداد کے پیش نظر بڑے چوراہوں پر گریڈ سیپریٹڈ انفراسٹرکچر کو ناگزیر قرار دیا جارہا ہے۔
توقع ظاہر کی جارہی ہے کہ نئے انفراسٹرکچر کی تکمیل کے بعد سگنل فری کوریڈور سے روزانہ 2 لاکھ سے زائد گاڑیاں مستفید ہوں گی۔ حکام کا کہنا ہے کہ بہتر روٹ نہ صرف مقامی شہریوں کے لیے فائدہ مند ہوگا بلکہ موٹرویز اور دیگر اہم علاقائی راستوں کی طرف جانے والی بین الاضلاعی ٹریفک کو بھی سہولت فراہم کرے گا۔