تاریخ اشاعت: May 7, 2026 - 3:30 PM
Government Plans to End General Electricity Subsidy for Consumers Using Up to 200 Units, Assures IMF of Targeted Relief System
200 یونٹ تک بجلی پر عمومی سبسڈی ختم کرنے کی تیاری، حکومت کا آئی ایم ایف کو ہدفی نظام متعارف کرانے کا وعدہ
▫️جنوری 2027 سے بی آئی ایس پی اور این ایس ای آر ڈیٹا کی بنیاد پر صرف مستحق صارفین کو رعایت ملے گی
حکومتِ پاکستان نے بین الاقوامی مالیاتی فنڈ (آئی ایم ایف) کو بجلی سبسڈی کے موجودہ نظام میں بنیادی تبدیلیوں کی تحریری یقین دہانی کرا دی ہے، جس کے تحت 200 یونٹس تک بجلی استعمال کرنے والے صارفین کو دی جانے والی عمومی سبسڈی مرحلہ وار ختم کر کے جنوری 2027 سے ہدفی (ٹارگٹڈ) سبسڈی کا نیا نظام نافذ کیا جائے گا۔
سرکاری ذرائع کے مطابق نئے ماڈل کے تحت سبسڈی صرف ان صارفین کو فراہم کی جائے گی جو بینظیر انکم سپورٹ پروگرام (بی آئی ایس پی) اور نیشنل سوشیو اکنامک رجسٹری (این ایس ای آر) کے ریکارڈ کے مطابق مالی طور پر مستحق قرار پائیں گے۔ اس اقدام کا مقصد بجلی سبسڈی کے نظام کو شفاف بنانا، مالی بوجھ کم کرنا اور غیر مستحق افراد کو فائدہ اٹھانے سے روکنا ہے۔
ذرائع کا کہنا ہے کہ موجودہ نظام میں بعض گھرانے ایک سے زائد بجلی میٹر نصب کرا کے ہر میٹر کی کھپت 200 یونٹس سے کم رکھتے ہیں تاکہ زیادہ سے زیادہ سبسڈی حاصل کی جا سکے۔ حکومت کا مؤقف ہے کہ ہدفی سبسڈی کے نفاذ کے بعد اس قسم کے غیر قانونی یا غیر منصفانہ طریقوں کی حوصلہ شکنی ہوگی اور صرف حقیقی ضرورت مند صارفین کو ریلیف مل سکے گا۔
حکومت اس منصوبے کے لیے بجلی صارفین کے ڈیٹا کو این ایس ای آر کے ساتھ منسلک کرنے پر کام کر رہی ہے، جبکہ اس عمل میں عالمی بینک بھی تکنیکی معاونت فراہم کرے گا۔ ذرائع کے مطابق سبسڈی کی ادائیگی اور نگرانی کے لیے ایک بیرونی فرم کے ذریعے مؤثر اور شفاف نظام تشکیل دینے کی تجویز بھی زیر غور ہے۔
ماہرین کا کہنا ہے کہ حکومت کی جانب سے سبسڈی کے نظام میں یہ تبدیلیاں ایک وسیع معاشی اصلاحاتی پروگرام کا حصہ ہیں، جن کا مقصد توانائی کے شعبے میں مالی خسارے کو کم کرنا، محصولات میں بہتری لانا اور بین الاقوامی مالیاتی اداروں کا اعتماد بحال کرنا ہے۔