تاریخ اشاعت: April 11, 2026 - 11:05 AM
Hudayriyat Island Tops Abu Dhabi Real Estate Market in Q1 2026 Amid Record Growth
حدیریات آئی لینڈ نے 2026 کی پہلی سہ ماہی میں ابوظہبی کی رئیل اسٹیٹ مارکیٹ میں سبقت حاصل کرلی
▫️جائیداد کے مجموعی لین دین میں 160 فیصد سے زائد اضافہ، حجم تقریباً 18 ارب ڈالر تک پہنچ گیا
ابوظہبی | ری نیوز انٹرنیشنل ڈیسک نیوز ابوظہبی کی رئیل اسٹیٹ مارکیٹ نے 2026 کی پہلی سہ ماہی میں غیر معمولی ترقی ریکارڈ کی، جہاں حدیریات آئی لینڈ مجموعی فروخت کے لحاظ سے سرفہرست رہا۔ یہ اعداد و شمار سرکاری خبر رساں ادارے وام (WAM) کی ج...
ابوظہبی کی رئیل اسٹیٹ مارکیٹ نے 2026 کی پہلی سہ ماہی میں غیر معمولی ترقی ریکارڈ کی، جہاں حدیریات آئی لینڈ مجموعی فروخت کے لحاظ سے سرفہرست رہا۔ یہ اعداد و شمار سرکاری خبر رساں ادارے وام (WAM) کی جانب سے جاری کیے گئے ہیں۔
ابوظہبی رئیل اسٹیٹ سینٹر کے مطابق 2026 کی پہلی سہ ماہی کے دوران جائیداد کے مجموعی لین دین کا حجم 17.97 ارب ڈالر (66 ارب درہم) تک پہنچ گیا، جو گزشتہ سال کی اسی مدت کے مقابلے میں 160.7 فیصد زائد ہے۔ اس عرصے میں 13,518 ٹرانزیکشنز ریکارڈ کی گئیں، جبکہ 2025 کی پہلی سہ ماہی میں 6,896 سودے 6.89 ارب ڈالر (25.31 ارب درہم) مالیت کے تھے۔
حدیریات آئی لینڈ نے تقریباً 3.26 ارب ڈالر (11.97 ارب درہم) کے لین دین کے ساتھ مارکیٹ میں پہلی پوزیشن حاصل کی۔ موڈون کی جانب سے تیار کردہ یہ منصوبہ مجموعی مارکیٹ سرگرمی میں سب سے بڑا حصہ دار رہا، جو اسے ایک نمایاں سرمایہ کاری مرکز کے طور پر ابھار رہا ہے۔
الریم آئی لینڈ 2.57 ارب ڈالر (9.45 ارب درہم) کی ٹرانزیکشنز کے ساتھ دوسرے نمبر پر رہا۔ اس کی مسلسل مضبوط کارکردگی دارالحکومت میں رہائشی اور ملٹی پل استعمال کے منصوبوں کی بڑھتی ہوئی طلب کو ظاہر کرتی ہے۔
ماہرین کے مطابق ان دونوں علاقوں کی شاندار کارکردگی ابوظہبی کی پراپرٹی مارکیٹ پر سرمایہ کاروں کے بڑھتے ہوئے اعتماد کی عکاسی کرتی ہے، جس کی وجہ اعلیٰ معیار کے منصوبے، بہتر انفراسٹرکچر اور نئے ترقیاتی منصوبوں کا تسلسل ہے۔
خاص طور پر حدیریات آئی لینڈ اپنی مربوط کمیونٹی طرزِ ترقی کے باعث توجہ حاصل کر رہا ہے، جہاں رہائش کے ساتھ کھیل، تفریح، تعلیم اور ہوٹلنگ کی سہولیات ایک ہی جگہ فراہم کی جا رہی ہیں۔
شہری منصوبہ سازوں کے مطابق یہ پیش رفت ابوظہبی کی وسیع تر حکمت عملی سے ہم آہنگ ہے، جس کا مقصد پائیدار ترقی، مربوط کمیونٹیز اور بہتر معیارِ زندگی کو فروغ دینا ہے۔