تاریخ اشاعت: May 19, 2026 - 10:15 AM
Building Fitness Certificate Made Mandatory for Private Schools Across Punjab
پنجاب بھر میں پرائیویٹ سکولوں کیلئے بلڈنگ فٹنس سرٹیفکیٹ لازمی قرار دیدیا گیا
▫️بلڈنگز ڈیپارٹمنٹ سرٹیفکیٹ جاری کرے گا، نجی سکولوں کی جانچ کیلئے تھرڈ پارٹی کنسلٹنٹ مقرر کرنے کی تجویز
پنجاب میں پرائیویٹ سکولوں کے لیے بلڈنگ فٹنس سرٹیفکیٹ لازمی قرار دے دیا گیا ہے، جس کے تحت نجی تعلیمی اداروں کی عمارتوں کی مضبوطی، استحکام اور حفاظتی معیار کا باقاعدہ جائزہ لیا جائے گا۔
ذرائع کے مطابق سکول رجسٹریشن اور رجسٹریشن میں توسیع کے لیے بلڈنگ فٹنس سرٹیفکیٹ کو لازمی شرط بنانے کی تجویز دی گئی ہے، جبکہ یہ سرٹیفکیٹ بلڈنگز ڈیپارٹمنٹ کی جانب سے جاری کیا جائے گا۔ لاہور میں تقریباً 3500 نجی سکولز رجسٹریشن کے دائرے میں شامل ہیں، جن کی عمارتوں کی جانچ کے لیے ایک منظم طریقہ کار اپنانے کی سفارش کی گئی ہے۔
مراسلے کے مطابق نجی سکولوں کی جانچ کے لیے تھرڈ پارٹی کنسلٹنٹ مقرر کرنے کی تجویز سامنے آئی ہے، جبکہ آزاد انجینئرنگ فرم کو یہ ذمہ داری سونپنے کی سفارش بھی کی گئی ہے تاکہ سکول عمارتوں کا غیر جانبدارانہ اور تکنیکی بنیادوں پر معائنہ کیا جا سکے۔ پنجاب بھر میں نجی سکولوں کا یکساں انداز میں سروے کرانے کی تجویز بھی دی گئی ہے۔
مراسلے میں انکشاف کیا گیا ہے کہ بیشتر نجی سکول رہائشی عمارتوں میں قائم ہیں، جبکہ کئی عمارتیں ادارہ جاتی مقاصد کے لیے منظور شدہ نہیں۔ اس کے علاوہ متعدد سکول عمارتوں کے نقشے اور اسٹرکچرل ریکارڈ بھی دستیاب نہیں، جس کے باعث طلبہ، اساتذہ اور عملے کی حفاظت سے متعلق خدشات پیدا ہو رہے ہیں۔
بلڈنگ سیفٹی کو یقینی بنانے کے لیے جامع اسٹرکچرل جائزے کی تجویز دی گئی ہے، جبکہ عمارتوں کی ڈسٹرکٹیو اور نان ڈسٹرکٹیو ٹیسٹنگ کی سفارش بھی کی گئی ہے۔ حکام کے مطابق تکنیکی جانچ کا مقصد نجی سکولوں میں زیر تعلیم طلبہ کی حفاظت کو یقینی بنانا اور غیر محفوظ عمارتوں کی نشاندہی کرنا ہے۔
محکمہ کمیونیکیشن اینڈ ورکس پنجاب کی جانب سے جاری مراسلے میں سکول ایجوکیشن ڈیپارٹمنٹ سے فوری پالیسی فیصلہ طلب کیا گیا ہے۔ یہ مراسلہ سی ای او ڈی ای اے لاہور کے خط کی روشنی میں ارسال کیا گیا ہے۔