تاریخ اشاعت: November 11, 2026 - 10:01 AM
CDA Completes 92% of Development Work in Islamabad’s Sector C-14
اسلام آباد کے سیکٹر سی 14 میں ترقیاتی کام 92 فیصد مکمل
▫️ سی ڈی اے چیئرمین کی باقی ماندہ کام ترجیحی بنیادوں پر مکمل کرکے الاٹیز کو پلاٹوں کا قبضہ دینے کی ہدایت
کیپیٹل ڈیولپمنٹ اتھارٹی (سی ڈی اے) نے اسلام آباد کے سیکٹر سی 14 میں بنیادی انفراسٹرکچر کے تقریباً 92 فیصد ترقیاتی کام مکمل کر لیے ہیں، جبکہ بجلی کی فراہمی کے انتظامات بھی آخری مراحل میں ہیں۔
سی ڈی اے کے چیئرمین اور چیف کمشنر اسلام آباد سہیل اشرف نے 10 نومبر کو سیکٹر کا دورہ کرکے ترقیاتی کاموں کی پیش رفت کا جائزہ لیا۔ اس موقع پر حکام نے انہیں مکمل اور باقی ماندہ کاموں کے بارے میں بریفنگ دی۔
سیکٹر کی مرکزی سڑکوں پر سٹریٹ لائٹس نصب کی جا چکی ہیں، جبکہ سڑکوں اور گلیوں میں سائن بورڈز لگانے کا کام جاری ہے۔ لینڈ سکیپنگ اور شجرکاری کے کام بھی جاری ہیں۔ سی ڈی اے کے مطابق بجلی کی فراہمی کے انتظامات حتمی مراحل میں داخل ہو چکے ہیں۔
سہیل اشرف نے متعلقہ افسران کو ہدایت کی کہ باقی ماندہ کام ترجیحی بنیادوں پر مکمل کیا جائے اور الاٹیز کو ان کے پلاٹوں کا قبضہ بلا تاخیر دیا جائے۔ انہوں نے نئے سیکٹرز میں جاری ترقیاتی منصوبوں کی باقاعدگی سے نگرانی کرنے اور مسائل فوری حل کرنے کی بھی ہدایت کی۔
چیئرمین سی ڈی اے نے کہا کہ نئے سیکٹرز کی ترقی اتھارٹی انتظامیہ کی اہم ترجیحات میں شامل ہے۔ ان کے مطابق کئی دہائیوں بعد ان سیکٹرز میں ترقیاتی کام تیز کیے گئے ہیں اور ترقی یافتہ پلاٹوں کا قبضہ الاٹیز کے حوالے کرنے کا عمل بھی شروع ہو چکا ہے۔