تاریخ اشاعت: November 3, 2026 - 5:01 PM
DHA Estate Agents Association Lahore Elections: Code of Conduct Issued; Rs 200,000 Fine for Displaying Posters and Stickers
ڈی ایچ اے اسٹیٹ ایجنٹس ایسوسی ایشن لاہور انتخابات کیلئے ضابطہ اخلاق جاری، پوسٹرز، سٹکرز چسپاں کرنے پر 2 لاکھ روپے جرمانہ ہوگا
▫️ انتخابی مہم کیلئے کارنر میٹنگز اور ایک فائنل جلسے کی اجازت، انتخابی اخراجات کی کوئی حد مقرر نہیں، باہمی احترام اور شائستگی برقرار رکھنے پر زور
ڈی ایچ اے اسٹیٹ ایجنٹس ایسوسی ایشن (DHA EAA) لاہور کے چیف الیکشن کمشنر عاطف اعجاز نے انتخابات 2026ء کے لیے انتخابی مہم کا ضابطۂ اخلاق جاری کر دیا ہے۔
اعلان کے مطابق کسی بھی عمارت، دفتر، دکان، انتخابی دفتر یا نجی و ڈی ایچ اے کی ملکیتی جگہ پر اسٹیکرز، پوسٹرز یا بروشرز چسپاں کرنا ممنوع ہے۔ خلاف ورزی ثابت ہونے پر امیدوار پر 2 لاکھ روپے جرمانہ عائد کیا جائے گا۔
بروشرز کی تقسیم صرف ووٹرز اور ممبران کے دفاتر میں جا کر، براہِ راست ہاتھوں سے کی جا سکے گی۔ انتخابی مہم کے دوران کسی ووٹر، ممبر یا امیدوار کے خلاف تضحیک آمیز رویہ اختیار کرنے، نازیبا زبان یا گالم گلوچ استعمال کرنے اور توہین آمیز سوشل میڈیا پوسٹ کرنے کی بھی اجازت نہیں ہوگی۔ خلاف ورزی کی صورت میں الیکشن کمیشن کارروائی کر سکے گا۔
ضابطۂ اخلاق میں امیدواروں کے انتخابی اخراجات کی کوئی مخصوص حد مقرر نہیں کی گئی، تاہم امیدواروں سے اخراجات کم سے کم رکھنے کی توقع کی گئی ہے۔ الیکشن کمیشن نے امیدواروں اور ممبران پر زور دیا ہے کہ وہ انتخابی مہم کو خوشگوار، منظم اور شفاف انداز میں، باہمی احترام کے ماحول میں مکمل کرنے میں اپنا کردار ادا کریں۔
منجانب: چیف الیکشن کمیشن، عاطف اعجاز