تاریخ اشاعت: June 1, 2026 - 12:15 PM
Lahore : Decision Made to Remodel Model Roads to Improve Traffic Flow
لاہور میں ٹریفک کی روانی بہتر بنانے کیلئے ماڈل روڈز کی ری ماڈلنگ کا فیصلہ
▫️ابتدائی مرحلے میں مین بلیوارڈ پر بس بیز وسیع کیے جائیں گے، رکشہ سٹینڈ بھی ازسر نو منظم کیا جائے گا
لاہور میں ٹریفک کی روانی بہتر بنانے اور شہریوں کو سفری سہولیات فراہم کرنے کے لیے ماڈل روڈز کی ری ماڈلنگ کا فیصلہ کر لیا گیا ہے۔ ابتدائی مرحلے میں مین بلیوارڈ پر ٹریفک فلو کو بہتر بنانے کے لیے ری ماڈلنگ کا عمل شروع کیا گیا ہے۔
چیف ٹریفک آفیسر لاہور سید عبدالرحیم شیرازی کے مطابق مین بلیوارڈ پر موجود 11 بس بیز میں سے 5 بس بیز کو وسیع کیا جائے گا تاکہ بسوں کے رکنے کے دوران مرکزی شاہراہ پر ٹریفک کی روانی متاثر نہ ہو۔
انہوں نے کہا کہ موجودہ صورتحال میں بسوں کے مین روڈ پر رکنے سے ٹریفک کے بہاؤ میں رکاوٹ پیدا ہوتی ہے، تاہم بس بیز کی توسیع سے اس مسئلے پر قابو پانے میں مدد ملے گی۔
سی ٹی او لاہور نے بتایا کہ مین بلیوارڈ پر میٹرو بس سٹاپ کے اطراف بے ترتیب ٹریفک کو منظم کرنے کے لیے رکشہ سٹینڈ کو بھی ازسر نو ترتیب دیا جا رہا ہے۔ نئے رکشہ سٹینڈ میں بیک وقت 12 رکشے پارک کیے جا سکیں گے، جبکہ ہر پانچ منٹ بعد رکشوں کو روانہ کیا جائے گا تاکہ مسافروں کو سہولت ملے اور ٹریفک کا بہاؤ بھی برقرار رہے۔
سید عبدالرحیم شیرازی کے مطابق ٹریفک انجینئرنگ اینڈ پلاننگ ایجنسی ٹیپا کے انجینئرز کی معاونت سے ری ماڈلنگ کا منصوبہ حتمی مراحل میں داخل ہو چکا ہے، جبکہ مختلف مقامات پر ٹریفک کی بہتری کے لیے عملی اقدامات کیے جا رہے ہیں۔
انہوں نے کہا کہ ڈیفنس موڑ پر سڑک میں مزید 18 فٹ جگہ شامل کر کے ٹریفک کی روانی بہتر بنائی جائے گی، جبکہ جین مندر چوک میں بھی ٹریفک مسائل کے حل کے لیے موجودہ منصوبے کو ازسر نو ترتیب دیا جا رہا ہے۔
سی ٹی او لاہور کا کہنا تھا کہ مین بلیوارڈ کی ری ماڈلنگ مکمل ہونے کے بعد شہر کی دیگر ماڈل روڈز کو بھی جدید تقاضوں کے مطابق ری آرگنائز کیا جائے گا، تاکہ شہریوں کو بہتر سفری سہولیات فراہم کی جا سکیں اور ٹریفک مسائل میں نمایاں کمی لائی جا سکے۔