تاریخ اشاعت: November 19, 2026 - 3:01 PM
Mirpur Administration Orders Crackdown on Illegal Construction and Encroachments
میرپور میں غیر قانونی تعمیرات اور تجاوزات کے خلاف کارروائی کا حکم، بلڈنگ قوانین پر سختی سے عمل درآمد کی ہدایت
▫️ کمرشل عمارتوں کے نقشوں کی منظوری کے لیے متعلقہ اداروں میں رابطہ کاری بڑھانے کا فیصلہ، ٹاؤن پلانر شیٹ لازمی قرار
کمشنر میرپور ڈویژن راجہ طاہر ممتاز خان نے شہر میں غیر قانونی تعمیرات اور تجاوزات کے خلاف سخت کارروائی اور شہری سہولیات کی بہتری کے لیے متعلقہ محکموں کو عملی اقدامات کی ہدایت کی ہے۔
کمشنر نے ہدایت کی کہ آزاد جموں و کشمیر سپریم کورٹ کے 2019 کے فیصلے کے بعد تجاوزات سے واگزار کرائی گئی اراضی کا تحفظ یقینی بنایا جائے۔ انہوں نے پارکنگ کے انتظامات بہتر بنانے اور غیر قانونی عمارتوں و تجاوزات کو پانی، بجلی اور دیگر بنیادی سہولیات کے کنکشن فراہم نہ کرنے کی بھی ہدایت کی۔ متعلقہ اداروں کو ٹاؤن پلاننگ قوانین پر عمل درآمد یقینی بنانے اور بنیادی ڈھانچے سے محروم سیکٹرز میں تعمیرات روکنے کا حکم دیا گیا۔
اجلاس میں میرپور ڈویلپمنٹ اتھارٹی (ایم ڈی اے)، میرپور ڈویلپمنٹ اینڈ ہاؤسنگ اتھارٹی (ایم ڈی ایچ اے) اور بلدیاتی اداروں کو عمارتوں کے نقشوں کی منظوری کے عمل میں باہمی رابطہ بہتر بنانے کی ہدایت کی گئی۔ کمرشل عمارتوں کے نقشوں کی منظوری میں تیزی لانے کے لیے متعلقہ محکموں کے نمائندوں کے ماہانہ کم از کم دو اجلاس منعقد کرنے کا فیصلہ بھی کیا گیا۔ حکام نے واضح کیا کہ ٹاؤن پلانر شیٹ کے بغیر کسی بھی عمارت کے نقشے کی منظوری نہیں دی جائے گی۔