تاریخ اشاعت: November 14, 2026 - 10:01 AM
Pakistan’s First Sponge Park Opens in Karachi to Conserve Rainwater and Reduce Urban Flooding
کراچی میں پاکستان کے پہلے سفنج پارک کا افتتاح، بارش کا پانی محفوظ کرنے اور شہری سیلاب کے خطرات کم کرنے کا منصوبہ
▫️ ڈبلیو ڈبلیو ایف پاکستان، گلبرگ ٹاؤن میونسپل کارپوریشن اور جی ایس کے کے اشتراک سے منصوبہ مکمل، زیرزمین پانی کی سطح بہتر بنانے، شہری ماحول کے تحفظ اور پائیدار آبی انتظام کو فروغ دینے کا ہدف
کراچی کے علاقے فیڈرل بی ایریا بلاک 8 میں پاکستان کے پہلے اسفنج پارک کا افتتاح کر دیا گیا ہے، جسے بارش کے پانی کو محفوظ کرنے، سڑکوں اور دیگر پختہ سطحوں پر پانی کے بہاؤ میں کمی لانے اور شہری سیلاب کے خطرات محدود کرنے کے لیے جدید ماحولیاتی ...
منصوبے کا بنیادی مقصد بارش کے پانی کو زمین میں جذب ہونے کا موقع فراہم کرنا، زیرزمین آبی ذخائر کی قدرتی بحالی میں مدد دینا اور شہری نکاسی آب کے نظام پر دباؤ کم کرنا ہے۔ ماہرین کے مطابق کراچی میں سڑکوں، عمارتوں اور کنکریٹ سے ڈھکی دیگر سطحوں کے باعث بارش کا بڑا حصہ زمین میں جذب ہونے کے بجائے نالوں کے ذریعے سمندر میں چلا جاتا ہے، جبکہ اس منصوبے میں پانی کے قدرتی بہاؤ اور جذب ہونے کے عمل کو بہتر بنانے پر توجہ دی گئی ہے۔
جمالی پارک میں بارش کا پانی جمع کرنے والے خصوصی باغیچے، قدرتی نکاسی آب کی سبز گزرگاہیں اور ایسے راستے تعمیر کیے گئے ہیں جن سے پانی زمین میں جذب ہو سکتا ہے۔ ان انتظامات کے تحت پارک بارش کے دوران اسفنج کی طرح پانی جذب کرنے اور اسے عارضی طور پر روکنے کی صلاحیت رکھتا ہے، جس کے بعد پانی بتدریج زمین میں منتقل ہو جاتا ہے۔ خصوصی باغیچوں میں بارش کا پانی نشیبی سبز حصوں میں جمع ہوتا ہے، جبکہ پودوں سے آراستہ قدرتی گزرگاہیں پانی کے بہاؤ کی رفتار کم کرنے اور اس میں موجود آلودگی کو چھاننے میں مدد دیتی ہیں۔ پارک میں مقامی اقسام کے درخت، حیاتیاتی تنوع کے تحفظ کے لیے مخصوص علاقہ، پولینیشن میں مدد دینے والے کیڑوں اور دیگر جانداروں کے لیے قدرتی مسکن اور شہریوں کی ماحولیاتی آگاہی کے لیے تعلیمی جگہ بھی قائم کی گئی ہے۔ ان اقدامات سے نہ صرف مقامی جنگلی حیات اور نباتات کے تحفظ میں مدد ملنے کی توقع ہے بلکہ شہری علاقوں میں سبزے کی کمی، بڑھتے ہوئے درجہ حرارت اور ماحولیاتی تبدیلیوں کے اثرات محدود کرنے میں بھی معاونت حاصل ہو سکتی ہے۔
افتتاحی تقریب سے خطاب کرتے ہوئے ڈبلیو ڈبلیو ایف برطانیہ کی ایشیا کے لیے سینئر پروگرام ایڈوائزر برائے تحفظ، وکالت اور پالیسی انعم فرحان نے کہا کہ جمالی پارک کی اسفنج پارک میں تبدیلی اس بات کی عملی مثال ہے کہ مقامی حکومتیں ماحولیاتی تبدیلیوں سے نمٹنے کے اپنے وعدوں کو عوامی مقامات پر قابل عمل منصوبوں میں کس طرح تبدیل کر سکتی ہیں۔ وزارت موسمیاتی تبدیلی و ماحولیاتی رابطہ کے بائیو ڈائیورسٹی پروگرام کے ڈائریکٹر نعیم اشرف راجہ نے منصوبے کو شہری حیاتیاتی تنوع کے تحفظ اور عالمی حیاتیاتی تنوع فریم ورک کے اہداف کے حصول کی جانب اہم پیش رفت قرار دیا۔ ڈبلیو ڈبلیو ایف پاکستان کے فریش واٹر پروگرام کے ڈائریکٹر سہیل علی نقوی نے کہا کہ یہ منصوبہ قدرتی وسائل پر مبنی انفراسٹرکچر کے ذریعے زیرزمین پانی کے ذخائر کی بحالی، مقامی نباتات کے تحفظ اور شہری آبی وسائل کے پائیدار انتظام کی عملی مثال پیش کرتا ہے۔ ان کے مطابق اس نوعیت کے منصوبوں کو کراچی سمیت ملک کے دیگر شہروں میں بھی متعارف اور وسیع کیا جا سکتا ہے تاکہ تیزی سے بڑھتی ہوئی شہری آبادی اور ماحولیاتی دباؤ کے نتیجے میں پیدا ہونے والے مسائل کا مقابلہ کیا جا سکے۔
گلبرگ ٹاؤن کے چیئرمین نصرت اللہ نے اعلان کیا کہ ٹاؤن کے دیگر پارکوں میں بھی اسی نوعیت کے ماحول دوست منصوبے متعارف کرانے کی منصوبہ بندی کی جا رہی ہے، جس سے کراچی میں اسفنج پارک کے تصور کو مزید فروغ ملنے کی توقع ہے۔ افتتاحی تقریب میں سرکاری اداروں، تعلیمی شعبے، سول سوسائٹی، کاروباری اداروں اور مقامی آبادی کے نمائندوں نے شرکت کی۔ ماحولیاتی ماہرین کے مطابق جمالی پارک کا منصوبہ بلدیاتی اداروں کے لیے ایک ایسا قابل تقلید ماڈل ہے جس کے ذریعے موجودہ پارکوں کی تعمیرنو اور نئے شہری ترقیاتی منصوبوں میں بارش کے پانی کے انتظام، زیرزمین آبی ذخائر کی بحالی اور حیاتیاتی تنوع کے تحفظ کو شامل کیا جا سکتا ہے۔ ماہرین کا کہنا ہے کہ تفریحی مقامات کو بارش کا پانی محفوظ کرنے والے قدرتی نظام سے منسلک کرکے شہری سیلاب کے مقامی خطرات کم کرنے، نکاسی آب کے نظام کو بہتر بنانے اور پاکستان کے تیزی سے پھیلتے شہروں میں ماحول دوست اور پائیدار شہری ترقی کو فروغ دینے میں مدد مل سکتی ہے۔