تاریخ اشاعت: August 8, 2026 - 11:39 AM
Dubai to Introduce Separate Rental Index for Shared Housing Under New Law
دبئی : مشترکہ رہائش کو باقاعدہ بنانے کیلئے نئی پالیسی متعارف کرانے کا فیصلہ
▫️نیا قانون 26 اگست سے نافذ ہوگا، مشترکہ رہائش کیلئے معیاری کرایہ معاہدے اور الیکٹرانک رجسٹر قائم کیا جائے گا
دبئی نے مشترکہ رہائش کے شعبے کو باقاعدہ بنانے کیلئے نئی پالیسی متعارف کرانے کا فیصلہ کیا ہے، جس کے تحت دبئی لینڈ ڈیپارٹمنٹ مشترکہ رہائش کیلئے مخصوص سکیم تیار کرے گا۔
نیا نظام دبئی کے قانون نمبر 4 برائے 2026 کے تحت متعارف کرایا جا رہا ہے، جو مشترکہ رہائش کے انتظام اور استعمال کو منظم کرتا ہے اور 26 اگست 2026 سے نافذ ہوگا۔
قانون کے تحت دبئی لینڈ ڈیپارٹمنٹ مشترکہ رہائش کیلئے کرایوں کا الگ اشاریہ تیار کرے گا اور اسے وقتاً فوقتاً اپ ڈیٹ کیا جائے گا۔ کرایہ طے کرتے وقت رہائشی یونٹ کی فنی خصوصیات، سہولیات اور معیار کو بھی مدنظر رکھا جائے گا۔
نئے نظام کے تحت مشترکہ رہائش کیلئے معیاری کرایہ اور انتظامی معاہدے بھی تیار کیے جائیں گے۔ ان معاہدوں میں مالک مکان، رہائشیوں کی تعداد، پراپرٹی کی تفصیلات اور مشترکہ رہائش کیلئے مختص جگہ کی معلومات شامل ہوں گی۔
دبئی لینڈ ڈیپارٹمنٹ مشترکہ رہائش کا ایک الیکٹرانک رجسٹر بھی قائم اور منظم کرے گا، جسے دبئی میونسپلٹی کی ڈیجیٹل نظام سے منسلک کیا جائے گا۔
قانون کے تحت کسی بھی رہائشی یونٹ کو مشترکہ رہائش کیلئے استعمال کرنے سے پہلے اجازت نامہ حاصل کرنا لازمی ہوگا۔
اجازت نامہ جاری کرنے سے قبل عمارت کے معیار، صحت اور حفاظت، آگ سے تحفظ، بجلی کے نظام، صفائی اور یونٹ میں زیادہ سے زیادہ رہائشیوں کی تعداد سمیت مختلف شرائط کا جائزہ لیا جائے گا۔
مشترکہ رہائش کا اجازت نامہ عام طور پر ایک سال کیلئے جاری ہوگا اور اسے دوبارہ حاصل کیا جاسکے گا۔ مالک کی درخواست پر بعض صورتوں میں اجازت نامہ دو سال کیلئے بھی جاری کیا جاسکتا ہے۔
نئے قانون کا مقصد دبئی میں غیر منظم مشترکہ رہائش، ضرورت سے زیادہ افراد کو ایک ہی یونٹ میں رکھنے اور غیر محفوظ رہائشی انتظامات کو محدود کرنا ہے۔
قانون کی خلاف ورزی پر 500 درہم سے 5 لاکھ درہم تک جرمانہ عائد کیا جاسکتا ہے۔ ایک سال کے اندر اسی خلاف ورزی کے دوبارہ ارتکاب کی صورت میں جرمانہ دوگنا ہوسکتا ہے، تاہم اس کی زیادہ سے زیادہ حد 10 لاکھ درہم مقرر کی گئی ہے۔
حکام خلاف ورزی کی صورت میں اجازت نامہ منسوخ کرنے، کاروباری سرگرمی معطل کرنے اور بعض حالات میں خلاف ورزی کرنے والے یونٹ کو خالی کرانے سمیت دیگر اقدامات بھی کرسکیں گے۔
دبئی میں مشترکہ رہائش کی طلب خاص طور پر کم اور درمیانی آمدنی والے رہائشیوں میں موجود ہے۔ نئے قانون کے ذریعے حکومت اس شعبے کو باقاعدہ رینٹل مارکیٹ کا حصہ بنانے، کرایوں میں زیادہ شفافیت پیدا کرنے اور رہائشی معیار بہتر بنانے کی کوشش کر رہی ہے۔